DILI, 09 setembru 2024 ( TATOLI)— Sarani Motael nahe Tais iha estrada laran diresaun Farol hodi simu Papa Francisco nudar identidade kultura Timor – Leste nian.
Frederico de Araujo reprezentante Sarani Motael hateten katak objetivu hosi nahe tais nu’udar kustume tradisaun Timor nian wainhira simu bainaka sira no reprezenta kultura Timor-Leste nian.
” Nahe Tais Ida ne simbolu identidade Timor oan nian, hatudu ba Amu Papa katak maioria povu Timor – Leste iha kultura hodi kesi metin unidade Nasional no fiar metin ba Maromak,” nia dehan.
Iha biban ida ne’e sarani sira kompustu husi Motael, bairo Formosa, Cai- Coli, bairo Pite, Farol no bairo seluk seluk tan antusiasmu tebes hodi simu Papa Francisco.
Komunidade hakilar Viva Viva Papa hodi simu Papa Francisco
Parte seluk, sarani Kristaun Timor – Leste rihun ba rihun antusiasmu forma iha lina naruk Aeroportu ba too Nunsiatura Apostoliku iha Motael hodi simu Amu Papa Francisco nia bensaun.
Tuir observasaun TATOLI katak maske loron manas maibe sarani sira la baruk hodi nafatin firme iha sira nia lina ho razaun atu hetan fatin hodi nune’e bele hetan bensaun husi Amu Papa Francisco.
Parte seluk, Felisberta Amaral husi Bairo Formoza dehan ohin ho sarani kuaze rihun ba rihun mai forma iha dalan portokolu razaun hakarak hetan fatin para bele hetan bensaun husi Amu Papa.
” Ami husi Bairo Formoza forma iha lina Eto Fuel nia oin komesa hosi tuku 10:30 OTL dadersan ho razaun atu hetan fatin hodi nune’e bele simu bensaun husi Amu Papa,” Nia dehan.
Iha fatin hirak sarani ne’e sira tantu labarik kiik, katuas no ema bot hakilar Viva Viva Viva Amu Papa wainhira Amu Papa liu iha dalan atu ba Nunsiatura Apostoliku.
Iha observasaun ne’e mos maioria komundade no Sarani uja kamizola papa no bandera Vatikanu hamutuk ho bandera nasional Timor-Leste nomos Taka sumbrina hodi kontinua hakilar Viva Viva Viva Papa.
Papa Francisco ho aviaun Air Niugini to’o iha Aeroportu Internasionál Prezidente Nicolau Lobato, Dili, segunda ne’e.
Boeing 737 sai husi Aeroportu Internasionál Jacksons Port Moresby iha tuku 11ho balun otl no semo to’o aeroportu Dili iha tuku 14h27.
Jornalista : Camilio de Sousa
Editora : Armandina Moniz
