DILI, 09 setembru 2024 (TATOLI)— Kompania IRAMOR fornese be’e hemu gratuita ba sarani no peregriñu sira iha rotunda Prezidente Nicolau Lobato Comoro Dili hodi hein vizita Papa Francisco nian durante loron tolu husi 09 to’o 11 setembru 2024.
Jestor Kompania IRAMOR, Anselmo António Freitas esplika IRAMOR konsidera vizita ida ne’e hanesan grasa ida ba Timor-oan oan hotu nune’e ho inisiativa rasik hakarak hola parte mós ba vizita Papa Francisco nian liu-liu tulun sarani sira ne’ebé lao hodi halo prosesaun no mai hein vizita Papa nian iha rotunda Prezidente Nicolau Lobato.
“Agora dadaun ita nia vizita husi Sua Santidade Papa Francisco mai Timor-Leste hanesan grasa ida entaun ida ne’e ami iha inisiativa rasik voluntarimanente ami hakarak fornese be’e hemu ba sarani sira liu-liu sira ne’ebé mai husi munisípiu atu hemu gratuita,” Anselmo Freitas ba Tatoli iha Rotunda Nicolau Lobato Dili, segunda ne’e.
Nia hateten IRAMOR hanesan mos membru husi CCI-TL (Camâra Comércio Insdústria Timor-Leste) hetan mós orientasaun atu partisipa maximu durante Papa nia vizita mai Timor-Leste ho voluntariamente.
“Ami mos hanesan membru rasik nune’e ami voluntarimente, ba preparasaun ne’e ami sei oferese husi ohin durante loron tolu to’o Amo Papa fila ba Singapura. Ami hakarak instala ba fatin tolu hanesan Akanunu no Tibar tan maibé tanba iha ona ita nia parseiru seluk oferese entaun ami monta deit mak iha Rotunda Nicolau Lobato no iha Tasitolu besik Pelican Paradise ne’ebé ami prepara Garpaun (Galon) atu sarani sira konsumu,” deklara Jestor IRAMOR ne’e.
Fasilidade be’e mós ne’ebé IRAMOR oferese ne’e monta iha loron 08 setembru lorokraik ho tanke be’e rua ho kuantidade litru 1,200, makina filtru avansadu husi Amérika nian tornera sanulu inklui kopu ba sarani no peregriñu sira atu bele hemu be’e mos.
Peregriñu husi Oe-cusse, Candida Oesbele agradese kompania iha inisiativa ne’e atu tulun sarani sira laó ain husi do’ok bainhira sente hamrook la presiza hasai osan ba hola. “Be’e tau hanesan ne’e diak tanba ita lori deit akua mamuk ba tau. Agradese para lao dook ne’e ita bele uza.”
Candida Oesbele nia kaben Jacinto Lafu mós haktuir maske governu desloka peregriñu Oe-cusse tenke hela iha Pelican Paradise maibé prontu lao mai hein Papa Francisco iha rotunda Prezidente Nicolau Lobato. “Ami lao tesik mai tuku sia dader ne’e, mas ami kontente hodi hein, no ita tenke halo sakrifisiu ida ne’e iha loron ida la han mós ita bosu nafatin,” nia dehan.
Tuir observasaun Jornalista Tatoli iha terenu, husi dader 7:30 OTL sarani no peregriñu lao ona husi idak-idak nia fatin hodi mai hein vizita Papa Francisco nian iha areadores rotunda Prezidente Nicolau Lobato nian maske tuir planu Sua Santidade ho ekipa sei to’o Timor -Leste iha oras 14:10 ho aviaun Air Niugini.
Jornalista : Cidalia Fátima
Editora : Armandina Moniz
