DILI, 10 setembru 2024 (TATOLI)–Iha ema wa’in ba wa’in be hamriik hein Santu Padre iha Estrada Faról ne’e, iha inan-feton ida hanesan ema ho defisiénsia tuur iha kadeira roda, hamutuk ho nia bei’oan sira, tuur ho esperansa atu bele haree Papa Francisco ne’ebé atu liuhusi dalan ne’e atu ba fatin deskansa Nunsiatura Apostólika iha Motael.
“Ha’u gosta hare amu Papa, maske ha’u senti kondisaun fízika limitadu ho kadeira roda, ha’u hakarak dala ida tan hare Papa. Uluk iha tinan 1989 ha’u hare ona Papa João Paulo II, agora ha’u hakarak haree tan Papa Francisco. Uluk, ha’u mai simu amu Papa João Paulo II, agora ha’u la mai simu Papa Francisco ne’e ha’u sente moe, tanba ha’u ema fiar-na’in Katolika, ha’u fiar metin,” Marcelina Freitas, idade 74 ne’e hateten ba Agência Tatoli iha Faról, segunda ne’e.
Iha fatin hanesan, Kaika Helena Martina, idade kuaze 17, hateten hein Papa Francisco hahú husi tuku 10h00 dadeersan ho nia ama ho apa no Maun alin.
“Ami Lori biskuit no bee. Ami hodi hahan hodi hein amu Papa. Ami hakarak haree no halo video no foti liman simu Papa to’o mai iha ne’e no liu ba rezidénsia Nunsiatura Apostolika Motael ne’e,” nia dehan.
Maske loron manas maibé nia sente kontente hein amu Papa Francisco, tanba ba nia ne’e maske loron manas maibé manas ne’e sei liu no esperiénsia ne’e labele husik leiu leet de’it.
Papa tun iha aeroportu de’it, Timor hetan ona bensaun
Entretantu, sarani Luisa Gomes hateten sira sente kontente hamriik simu amu Papa nia pasajen iha Farol tama to’o iha rezidénsia Nunsiatura iha Motael.
“Ha’u sente kontente demais. Se di’ak karik, ha’u kaer nia liman tanba vigariu Jesus no susesór São Pedro nian ne’e bele mai Timor-Leste. Ida-ne’e la´ós beibeik, nia mai fó bensaun. Bainhira mak ita haree tan fali Papa no nia mai fali,” Luiza Gomes hateten ba Agência Tatoli iha Motael.
Nia esplika, fiar igreja katólika nian ida-ne’e prezensa São Pedro no vigáriu Kristu nian mai rai doben Timor-Leste hodi hare nia bibi atan sira hodi hametin fiar.
“Klaru katak direta ka indireta tun iha aeroportu Timor ne’e Papa fó ona bensaun ba iha Timor-Leste. Ita tenke agradese ba Maromak, tanba bele simu no haree vigáriu Jesus nian,” nia dehan.
Iha sorin seluk, Gloria da Costa, sente laran taridu tanba labele konsege haree Amu Papa nia pasajen, tanba ema barak iha forma iha dalan ninin, maibé esforsu hakarak hetan iha momentu ida.
“Sei iha oportunidade aban hodi bele haree Papa iha Tasi-Tolu,” nia hateten.
Jornalista : Jesuína Xavier
Editór : Cancio Ximenes
