La akompaña misa ho diak, sarani balun deside fila
DILI, 10 setembru 2024 (TATOLI)–Sarani balun ne’ebé rejistradu atu tuir misa solene iha tasi-Tolu, deside fila-fali ba sira-nia uma tanba lahetan fatin no la akompaña misa ho di’ak.
“Ami uma do’ok loos iha liu terminal Becora. Ami tama ba laran maibé fatin mak laiha no la to’o ona ba ami ami, nune’e ami tenke fila. Ami la’ós atu ba uma maibé hein fali iha estrada de’it, hodi hein simu Amu Papa nia bensaun iha dalan ninin,” Rosalina de Jesus hateten ba Agência Tatoli, iha rotunda Prezidente Nicolau Lobato, Comoro. Tuir nia, hein iha Tasi Tolu ema barak, dala ruma mos lahetan amu no simu bensaun Santu Padre nian, entaun hein iha dalan ninin atu simu bensaun. “Ami iha Tasi Tolu iha liu kotuk, sira halo transmisaun ruma mos larona no lahare. Ami iha ai-hun bo’ot”.
Iha fatin hanesan, sarani Roque Akinu Martins mós hateten, nia la rejistu iha parokia sira maibé hakarak partisipa Amu Papa prezide misa solene ne’e.
“Ha’u lakonsege akompaña misa, agora atu fila-fali ba uma,” nia hateten.
Nune’e mos, Lorenço de Araújo haktuir fatin konsentrasaun ba sarani sira atu tuir misa ne’e labele akumula ema hotu, entaun la ajuda sarani sira tuir misa ho di’ak to’ o ramata,
“Ami akompaña misa haree iha ekran ne’ebé monta iha área Tasi-Tolu nian ne’e, maibé ami la haree hetan tanba dook liu. Ami lakonsege akompaña no rona Papa nia lian ida,” nia dehan.
La’ós ne’e de’it maibé nia dehan, tanba rai manas demais liu no la auguenta manas, tanba iha oras barak nia laran nia hein Papa Francisco iha tasi-Tolu.
“Ha’u atu fila ba uma tanba ha’u-nia uma iha liu Kasnafar, Manleu, suku Dare nian ne’e,” nia dehan.
Tuir observasaun, iha Estrada husi Tasi-Tolu mai rotunda Prezidente Nicolau Lobato nian ne’e, sarani sira la’o nadodok tutuir dalan atu fila-fali ba sira nia uma ho oin kolen be kolen.
Joralista : Jesuína Xavier
Editór : Cancio Ximenes
