DILI, 10 setembru 2024 (TATOLI)–Leitór orasaun universák ka orasaun dusfieis ho dialeitu husi munisipiu Lautém, Lourenço Fernandes, sente onradu sai leitor ba orasaun dusfieis ho dialeitu Fataluku iha misa solene ne’ebé prezide husi sua Santidade Papa Francisco iha 10 setembru 2024 iha Tasi-Tolu, iha 16h30 lorokraik.
Momentu sira hili tradusaun ne’e sira hili ha’u mak tradús rasik orasaun universal husi lian português no espanól ba lian Fataluku.
“Momentu ne’e sira hili ha’u tradús no sira mós haruka ha’u atu lee orasaun dusfieis. Onra, elojiu no ksolok boot ida ba ha’u tanba ho idade ida hanesan ne’e, serbisu kle’ur ona iha parokia no paróku, no sarani sira fó konfiansa ba lee orasaun ne’e iha Fataluku ne’e honra no gloria boot ida,” Litór Lourenco Fernandes hateten ba Tatoli, iha Tasi-Tolu.
Nia konsidera katak ida-ne’e inspirasaun maihusi espíritu nian ne’ebé leno amu sira-nia laran hodi hilia nia sai leitór.
“Ha’u lahein ida, maibé ida-ne’e inspirasaun Espiritu Santu nian ne’ebé leno amu sira-nia laran hodi hili ha’u,” nia dehan.
Iha fatin hanesan, leitora Imaculada Maria Luísa lafiar katak atu lee orasaun universál maibé maibé bainhira indika nia sai leitór ne’e halo nia atu semo ba lalehan.
“Amu sira hili ha’u ne’e, halo atu semo de’it, tanba kontente demais. Primeiru, hili ha’u atu sai ministra estraordinária maibé ha’u la soi, tanba ema sala-na’in labele kaer Na’in Jesus Cristo nia futar isin no raan. Entaun, amu sira kontaktu ha’u atu lee orasaun dusfieis,” nia hateten.
Nia hateten, nia parte sei la fiar amu sira atu hili nia, maibé amu dehan tenke fiaraan katak amu sira hili ó hanesan atu lee orasaun dufieis.
Leitora ne’e hateten, preparasaun ne’e iha inísiu defísil uituan, maibé katuas lia-na’in sira no ajuda treina hodi lee, tanba Baiqueno ne’e ita lee defísil lahanesan ema hakerek ne’e.
Leitór sira-ne’ebé hetan konfiansa atu lee orasaun universál ho dalen materna hanesan lian mambae lee husi Fabrizia dos Santos Exposto, lian maternal Makasae lee husi Ruben Bosco dos Santos, lian Bunak lee husi Francisco Miguel Martins, Lian Galolen ne’e lee husi Januário Natalino Soares da Silva, lian Baiqueno lee husi Imaculada Maria Luisa da Costa Pereira no lian maternal Fataluku ne’e lee husi Lourenço Fernandes.
Jornalista : Jesuína Xavier
Editór : Cancio Ximenes
