DILI, 10 setembru 2024 (TATOLI)-Regina do Rosario, inan husi Arcensio Ximenes nia matan-been monu tan nia oan hetan bensaun direta husi Sua Santidade Papa.
Arcensio Ximenes tinan-10 ho kondisaun defisiénsia komunikasaun (la hatene ko’alia) ne’e benzidu, bainhira Amu Papa ba vizita iha Madre ALMA, Praia dos Coqueiros, Dili, ohin dadeer ne’e.
Membru Polísia Nasionál Timor-Leste (PNTL) ne’e ho nia oan nu’udar portadór defisente ne’e sai husi hela-fatin – uma Vila Verde, iha tersa (10/09) ne’e, tuku 05h00 madrugada ho motor tanba de’it hein Amo Papa atu ba vizita iha Madre ALMA sira-nia fatin.
Regina, ho deviza Ajente Xefe hala’o kna’ar iha Departamentu Aprovizionamentu Komandu Jerál PNTL ne’e, ho nia oan Arcensio Ximenes, ho komunidade sira seluk mai forma hamutuk iha portaun Madre ALMA nia fatin ne’ebé Amo Papa atu liu. Nia ho nia oan defisiente ne’e ‘hadau’ hamriik kedan iha oin atu bele fasil asesu ka hetan oportunidade hasoru Amu Papa.
Antes Amu Papa atu mai vizita ALMA, ekipa seguransa sira ne’ebé lideradu hosi Diretór Servisu Nasionál Intelejénsia, Longuinhos Monteiro, husu pesoál seguransa ne’ebé halo seguransa iha área Madre ALMA nian hodi loke portaun, nune’e Regina ho nia oan tama hodi asesu ba tuur kedan iha madre ALMA nia fatin.
Ho biban ne’e, Regina do Rosario espresa nia sentimentu kontente tanba nia esforsu lori nia oan tinan-10 ne’e ba iha Madre ALMA nian hetan rezultadu – Amo Papa tula direta nia liman ba Arcensio. No, Regina konsidera ne’e milagre ida.
“Ha’u fiar la liu semana ida ka rua nia sei bele ko’alia hanesan ema seluk tanba ne’e grasa ida tanba Amo Papa rasik mak tula nia liman ba ha’u-nia oan,” Regina do Rosario otimista iha entrevista perante jornalista iha Madre ALMA nia fatin, Praia dos Coqueiros, tersa ne’e.
Kronolojia, tuir Regina do Rosario katak nia oan Arcensio sai defisiénsia komunikasaun durante tinan haat nia laran. Arcensio – oan mane tinan-10 ne’e, hatene la’o dolar de’it. Maibé, nu’udar inan, tuir Regina, esforsu nia bele la’o, bele han mesak. Arcensio ko’alia labele.
“Ha’u sente kontente tanba la imajina ohin bele kaer nia liman no simu bensa husi Amo ne’e ha’u kontente tebes tebes,” Regina do Rosario hato’o.
“Ha’u atu ko’alia oinsá? Ita la espera atu kaer nia liman ita atu bensa hanesan maibé ha’u bele bensa nia liman no simu bensaun Amo Papa ida hanesan milagre durante buat ne’ebé ha’u husu mak mai duni ona ne’e,”nia konklui ho otimista.
Jornalista: Natalino Costa
Editór: Rafael Ximenes de A. Belo
