DILI, 10 setembru 2024 (TATOLI)—Sarani sira iha tersa dadersaan ne’e hahú la’o ain husi ida-idak ninia uma no fatin konsentrasaun (peregrinu husi munisípiu seluk) to’o fatin misa solene, iha Tasi-tolu, ne’ebé sei prezide direta husi Papa Francisco.
“Ami la’o ain de’it Parókia la fasilita ami ho karreta, maibé ida-ne’e la sai kestaun, importante mak oinsá ha’u bele partisipa misa hodi simu bensaun gransa tanba Papa nia prezensa mai ne’e hafoin liu tinan-30 resin,” Sarani Olinda da Costa husi Parókia Ai-Mutin, informa ba Agência Tatoli, iha Bebonuk.
Maski misa ne’e hahú iha tuku 16:30, maibé sarani sira hahú mobiliza-an desde tuku 05:00 madrugada, nune’e bele hetan fatin.
“Ha’u hatene misa sei orsida lorokraik, maibé tuir oráriu ne’ebé Komisaun Organizadora fó sai, sarani-sira tenke tama sedu hodi prinse fatin ne’ebé preparadu ona, molok Papa to’o fatin misa, ” nia akresenta.
Notísia relevante : Peregrinu husi Viqueque no Lautem hahú desloka ba Tasi-Tolu partisipa misa solene
Iha sorin seluk, Sarani Agostu da Costa husi Parókia Motael, hateten, sira la’o de’it tama to’o Tasi-tolu, nune’e sente kolen maibé hamutuk ho família tenke halo tanba momentu ne’e sei la repete.
“Sente kole iha, maibé ida-ne’e la hamate ami-nia espíritu fiar nian, tanba ita sei tuir misa diretamente ne’ebé prezide husi ita-nia ulun-boot katólika,” nia tenik.
Tuir observasaun husi Jornalista Agência Tatoli iha terrenu, nota katak hahú husi Manleuana, Ponte III, Ponte CPLP, Bebonuk to’o mai estrada boot Tasi-ibun besik Supermarket Centro, sarani sira ain lori kedas ho idaidak nia bukae hanesan, hahán, bee hemu, kadera, sumbriña, no seluk tan.
Jornalista : Arminda Fonseca
Editora : Julia Chatarina
