DILI, 10 setembru 2024 ( TATOLI) – Koordenadór Ospitál Temporáriu iha Tasi-Tolu, Vidal Lopes, informa sarani sira ne’ebé monu iha areadór misa nian, dezde dader mai halo tratamentu iha ospitál temporáriu hamutik 31.
”Pasiente sira ne’ebé mak ekipa ambulánsia evakua hahú husi tuku 6:00 to’o tuku 17:00, mai halo tratamentu iha ospitál temporáriu hamutuk 31, maioria joven”, Vidal Lopes dehan ba TATOLI iha Opsitál Temporáriu iha Tasi-Tolu, ohin.
Nia dehan, pasiente sira ne’e monu tanba sira kolen, hamlaha no hamrook, entaun husi Post Saúde sira hahú halo primeiru sokoru, maibé la di’ak, ambulánsia tula mai iha Ospitál Temporáriu ida-ne’e hodi hetan asisténsia médika.
”Bainhira sarani sira evakua mai médiku sira halo kedas atedimentu másimu ikus 18 mak ami fó alta hodi sira ba fatin areadór misa atu tuir misa ne’ebé mak prezide husi Papa Fransisco’, nia esplika.
Nia afirma, pasiente sira ne’ebé mak evakua mai ne’e iha na’in-ida mak profisionál saúde sira transfere ba Hospitál Nasionál Guido Valadares tanba pasiente refere antes ne’e sofre ona moras pulmaun.
”Iha na’in-ida mak ami halo transferénsia ba HNGV, tanba nia monu, maibé nia mós kauza husi moras seluk ne’ebé mak antes ne’e iha hanesan pulmaun, entaun ami halo transferénsia, nune’e kontinua halo tratamentu iha ne’eba”, nia haktuir.
Nia informa, sarani sira, daudaun ne’e, baixa iha ospitál temporáriu ida-ne’e hamutuk 12.
“Sira na’in-12 sei iha ne’e sei baixa iha ne’e, bainhira di’ak ona ami haruka fila”, nia konklui.
Notísia relevante : CVTL evakua sarani feto na’in-rua monu iha Vila-Verde
Jornalista : Felicidade Ximenes
Editór : Zezito Silva
