PAM Viqueque: Sua Santidade Papa Francisco lori dame mai timoroan
DILI, 10 setembru 2024 (TATOLI)- Prezidente Autoridade Munisípiu (PAM) Viqueque, Francisco Cruz S. de Gonzaga Soares, hateten, vizita Sua Santidade Papa Francisco nu’udar lider Igreja Mundial no Xefe Estadu Vaticano, hodi lori dame mai Timoroan.
“Ha’u sente presenza sua santidade Papa Francisco bele lori ambiente respeita malu, faternidade umana. Tan ne’e, ha’u hanoin vizita sua santidade Papa mai Timor ba dala-rua, primeiru ita-nia Papa João II ne’ebé hala’o vizita iha loron 12 Outubru tinan 1989, vizita mai Timor no halo misa ida iha tasi-tolu, Díli. Hafoin Papa João II nia vizita ita timoroan hetan naroman, ho vizita Papa nian ba mundu tomak akompaña ita-nia situasuan to’o ita ukun rasik an ne’ebé vizita ne’e Papa nian ita sai ezemplu ba mundu sira seluk liuliu ba ita-nia libertasaun”, Francisco Cruz S. de Gonzaga Soares, hateten ba Agência Tatoli, iha akampamentu, Hera, ohin.
Nune’e, nia espera iha vizita ne’e sua santidade Papa Francisco ida-ne’e fila mós husik grasa ba povu.
“Ita esperansa katak Papa mai ita hetan bensaun, depois ukun rasik an hodi fó mudansa ba ita-nia moris, tempu ona ita tenke hamutuk hadi’a povu nia moris ”, espera Autoridade Viqueque ne’e.
Rui inisiativa apoia karreta fasilita peregrina Lacluta
Entretantu, Sarani husi postu Lacluta, Rui da Costa, inisiativa apoia transporte karreta ida ba peregrinu na’in-20 husi aldeiak Ai-lok, suku Dilór, postu administrativu Lacluta, munisípiu Viqueque ba partisipa misa solene Sua Santidade Papa Francisco iha Tasi-Tolu
“Peregrina sira-ne’e mesak feto na’in-20 hakarak ba partisipa misa solene husi Sua Santidade Papa Fransisco, maibé karreta atu tula sira laiha. Peregrinu sira-ne’e ba konfirma komisaun sira husi postu Lacluta, maibé komisaun dehan karreta laiha hodi tula sira, nune’e ha’u apoia sira”, Rui da Costa ba Tatoli, iha akapamentu Hera, ohin.
Tuir dadús peregrinu husi postu Lacluta ho totál hamutuk rihun 1.014 ho kareta fixu hsmutuk unidade 26 tula peregrinu sira.
Jornalista : Vitorino Lopes da Costa
Editór : Florencio Miranda Ximenes
