DILI, 10 setembru 2024 (TATOLI)–Sua Santidade Papa Francisco hateten, ema ida-idak sei entende entende domin bainhira nia tama ba prátika domin iha ninia moris loro-loron.
Santu Padre hateten, iha forsa ida-ne’ebé lori nia husi nia fuan hodi hanoin no ko’alia katak Jesus ko’alia kona-ba julgamentu iha loron ikus “mai ho ha’u, la’ós tanba batizadu, reza, liuhusi igreja reza maibé mai ho ha’u tanba fo atensuan ba ha’u, imi tama ho ha’u.
“Jesus dehan, bainhira ha’u hamlaha imi fó han ha’u, hamrook ne’e imi fó hemu no moras ne’e imi sei vizita ha’u. Ha’u gosta bolu ida-ne’e sakramentu ki’ak. Domin ne’ebé anima, konstrutivu no fortalese, ida-ne’e mak naran domin, tanba sein domin, labele entende hotu. Ida-ne’e mak ita kompreende Jesus nia domin. Ita labele entende se latama iha domin Jesus iha ita iha prátika domin,” Amu Papa Francisco hateten iha nia diskursu bainhira hala’o vizita pastorál ba iha kongresaun madre Asosiasi Lembaga Minsionaris Awam (ALMA) iha Pantai Kelapa, tersa ne’e.
Tuir nia, ema labele intende domin Maromak nian, se latama iha moris prátika domin, fahe moris ho ema ki’ak, ema-ne’ebé presiza, ne’e programa kristaun no ema hotu nian.
“Ha’u agradese ba imi hotu no labarik sira-ne’ebé husik sira-nia aan, imi kuidadu, tanba sira hanorin ita oinsá Maromak kuidadu ita, atu Maromak kuida ita. Jesus ita-nia mestre. Husik aan Maromak kuida ita. Buat ne’ebé Silvanu hanorin ba ita mak nia husik nia aan ne’e ita kuidadu, hanesan mós ita husik ita-nia aan Maromak kuidadu. Haree nia oin kalma hela de’it,” nia dehan.
Sua Santidade sujere ba ema hotu, atu husik ema ida-idak nia aan mak Maromak sei kuidadu ema ida-idak tanba husik aan ne’e ema sei hadomi.
Iha fatin hanesan, Madre Superiora Asosiasi Lembaga Misionaris Awam (ALMA), Getrudis Bidi, hateten mehi ne’ebé ALMA iha mak hakarak moris evanjellu sai realidade no efetivu iha moris loro-loron iha komunidade no sosiedade.
Nia haktuir Santu Padre nia liafuan hodi konfirma sira-nia misaun kona-ba servisu ba ema ki’ak katak, ema ki’ak ho nia nesesidade espesiál salva ema seluk, tanba sira hatudu Na’i Maromak nia oin ba ema hotu.
“Obrigada ba Amu Papa nia hanorin ne’ebé husik hela ba nia bibi atan sira,” nia hateten iha ninia diskursu.
Madre ALMA kuidadu ema ho kondisaun down symdrom, nesesidade espesiaá hanesan ema ki’ak, ema hod efisiénsia, autizmu, abandonadu, má nutrisaun no kuran fiar no seluk tan.
Ikus liu, madre superiora mós hato’o agradesimentu ba vzita amu Papa ninian ba iha ALMA no labarik sira, tanba ho Papa nia prezensa mai vizita ALMA no Timor-Leste bele fó grasa no bensaun ba ema hotu hodi serbí ema ki’ak no fiar metin liutan iha Maromak.
“Ami reza atu Maromak fó saúde di’ak Papa Francisco,” nia dehan.
Joralista : Jesuína Xavier
Editór : Cancio Ximenes
