Papa Francisco : Padre no Madre ne’ebé Ferik no Katuas mak osan mean Igreja nian
DILI, 10 setembru 2024 (TATOLI)– Papa Francisco rekoñese kontribuisaun husi Padre no madre sira ba Igreja Katolika liu-liu ba sira ne’ebé idade ferik no katuas ona. Tanba, sira mak osan mean igreja nian.
Liafuan hirak ne’e Papa Francisco hato’o hafoin remata nia mensajen ba konfisaun ba relijiozu no relijioza sira iha Igreja Maria Imaculada da Conceição Katedral, tersa ne’e.
“Agradese bo’ot tebes, agradese ba Padre no Madre sira ne’ebé ferik no katuas, sira mak ita nia osan mean,” Papa Francisco dehan iha Igreja Katedral.
Tuir Papa Francisco, Igreja presiza amululik sira, ema konsagradu sira no katekista sira ne’ebé apaixonadu, preparadu no kriativu. “Ha’u agradese ba sasin husi Florentino (Florentin de Jesus Martins, Katekista Munisípiu Ermera), katekista ida ne’ebé dedika parte bo’ot ida husi nia moris ba ministériu furak ida-ne’e,” nia haktuir.
Sua Santidade ba Padre sira hateten liafuan “Padre”, ne’ebé nu’udar títulu importante liu iha Timor no signifika “na’i”. Maibé ida-ne’e labele provoka Padre sira nia sentimentu superioridade nian iha relasaun ho povu, hodi hamosu tentasaun orgullu no podér nian; “Ida-ne’e labele halo ita-boot hanoin kona-ba ministériu hanesan prestijiu sosiál ida, atua hanesan xefe sira ne’ebé domina ema seluk.”
“Mai ita hanoin ida-ne’e : ho mina-morin kose Kristu nia ain, ne’ebé mak ita-nia maun-alin sira iha fiar nia ain, hahú husi sira ne’ebé kiak liu. Jestu ne’ebé, iha-ne’e, sarani sira iha bainhira hasoru amululik sira mak elojénsia: sira kaer sira-nia liman konsagrada no lori ba sira-nia reen-toos nu’udar sinál bensaun nian,” dehan Papa.
“Keta laran-kraik! Hanesan Padre Sancho fó hanoin mai ita iha ninia sasin ne’ebé emosionante: “Maromak hatene tau matan ba sira ne’ebé Nia bolu no haruka ba misaun”. Ha’u haraik bensaun ba ita-boot husi ha’u nia fuan. No ha’u husu ba ita-boot atu reza ba ha’u,” Papa hakotu nia diskursu.
Madre Ursula Saragih husi Kongregasaun FCJM – Franciscan Sisters Daughters of the Sacred Hearts of Jesus and Mary agradese ba mensajen furak sira husi Papa Fransico nian no espera ida ne’e bele hafanun nafatin konfisaun relijiozu sira atu serbi ho diak liu tan.
“Ha’u ema Sumatera (Indonesia) agora Ha’u hela iha Viqueque, sente kontente bele hare’e direita Sua Santidade, ida ne’e hanesan mehi ida maske triste ituan labele kaer liman hodi hola bensa. Nia mensajen furak deit atu ita banati tuir, ami ohin sente terharu ho nia prezensa,” Madre Ursula dehan ba Tatoli.
Iha fatin hanesan, Frei Raul Araújo husi Atauro, Membru Kongregasaun Ordo Fratrum Minorum (OFM) rekoñese sorumutu ho Papa Francisco ne’e nunka hanoin atu akontese maibé ida ne’e lori ksolok ba Nia.
“Tanba Hau laiha hanoin no planu atu hasoru Papa maibe felizmente ohin hasoru no hare’e nomos rona direta nia diskursu sira. Ida ne’e hanesan ksolok ne’ebé hau labele esplika ho palavra, pelumenus sente ksolok iha fuan hanesan foin sae ida,” esplika Frei Raul.
Frei Fransiskanu ne’e nota mensajen Papa Francisco nian ba igreja, relijiozu sira no timoroan hotu hanesan motivasaun ida hodi kontinua misaun no vokasaun iha dalan kristu nian.
Jornalista : Cidalia Fátima
Editora : Armandina Moniz
