DILI, 09 setembru 2024 (TATOLI)— Reprezentante Ekipa Avansadu husi Munisípiu Manufahi, Jean Paulo Crúz da Costa, informa, peregrinu 3.000-resin hahú prepara hodi partisipa iha misa solene ne’ebé prezide direta husi Papa Francisco, iha Tasi-tolu, tersa (10/09).
“Peregrinu sira husi Manufahi nian hahú prepara ona no tuku 11:00 sei sai husi akapamentu hodi partisipa iha misa solene iha Tasi-tolu, ne’ebé ami kontetente no sente onradu tanba bele tuir misa solene ne’ebé Na’i Papa Francisco mak prezide misa,” Jean Paulo hateten iha fatin akampamentu, Manleuana, tersa ne’e.
Notísia relevante : Ekipa avansada Manufahi prepara karreta 100-resin hodi transporta peregrinu 3.000 mai Dili
Peregrinu sira viajen mai Dili iha segunda (09/09) iha tuku 13:00 no to’o Dili iha tuku 17:00 lorokraik, maibé nafatin iha espíritu, vontade no forsa hodi partisipa iha misa.
“Ami-nia vontade la mihis no sente nakonu ho espíritu ne’ebé Papa Francisco lori mai, tanba ne’e tenke partisipa misa no simu bensaun husi Amu Papa,” nia tenik.
Peregrinu sira husi munisípiu Manufahi maihusi Parokia Same, Alas, Fatuberlio no Turiscai.
Jornalista : Osória Marques
Editora : Julia Chatarina
