DILI, 10 setembru 2024 (TATOLI)–Iha dadeersan, antes loromatan sa’e husi lorosa’e, sarani sira husi dioseze baucau ne’ebé konsentra iha Hudi-Laran no sarani sira iha parókia sira iha kapitál Dili, hahú book-aan ho karreta tun iha rotunda Prezidente Nicolau Lobato, Comoro, Dili.
Sarani sira-ne’e halao peregrina husi rotunda Comoro hodi la’o ba Tasi-Tolu atu parrtisipa misa ne’ebé Papa Francisco sei prezide iha Tasi-Tolu, iha orsida lorokraik tuku 16h30 lorokraik.
Iha peregrinasaun ne’e, sarani sira ida-idak lori sira-nia bukae hodi bele kalsu sira-kabun nmamuk to’o lorokraik, lori kadeira iha liman bainhira kolen karik bele tuur, xapeo doku helik netik sira ulun husi loromanas, salurik ho satan netik loron nia manas, no lori banderolas no bendeira Vatikanu no Timor-leste iha sira-ida-idak nia liman hod lori tutuir.
Iha Estrada husi rotunda ba tasi-Tolu ne’e, sarani sira-ne’e orienta no organiza husi servisu voluntáriou sira no membru Polísia Nasionál Timor-Leste (PNTL) no Falintil-Forsa Defesa Timor-Leste (F-FDTL).
Atu akompaña sarani hirak ne’e, iha mós ekipa saúde ne’ebé koloka iha rotunda Comoro hodi bele tau matan ba sarani sira.
Servisu voluntariou husu igreja Porfírio de Carvalho Soares hateten, sira hahú hein sarani sira iha rotunda Prezidente Nicolau Lobato ne’e hahú husi tuku 05h00 dadeersan.
“Ami hein iha ne’e hahú tuku lima dadeersan. Oráriu tama iha tuku hitu, maibé sarani sira husi dioseze Dili no Baucau hahú tama ba Tasi-Tolu ne’e tuku neen kedas sira ba ona ne’ebá,” nia dehan ba Agência Tatoli, iha rotunda Comoro.
Jornalista : Jesuína Xavier
Editór : Cancio Ximenes
