Dili, 10 setembru 2024 (TATOLI)- Komunidade Musulmanu no sarani Evanjelika husi postu administrativu Uatulari, munisipiu Viqueque, espera ho vizita Sua Santidade Papa Francisco mai Timor-Leste sei lori pás no unidade ba Timoroan sira.
“Tanba ita-nia Governu no amu-sira asina akordu kona-ba fraternidade umana ne’ebé ha’u hanoin orgullu boot lori dame ba ita hotu. Ba se de’it ho relijiaun saida de’it, tantu ema ki’ak ka ema riku,” Zainal Abadin, hateten ba jornalista Agência Tatoli, iha Dili, ohin.
Nia hateten durante ne’e mosu konflitu entre foinsa’e sira, tanba difrensia idea no opiniaun tanba ne’e ho vizita Amu Papa nian sei hametin unidade no respeita malu hodi kontribui ba dezenvolvimentu nasional.
“Ezemplu hanesan iha nasaun Indonézia povu maioria radikál Islamiku, maibé ita haree Prezidente no musulmu nian boot simu ho di’ak. Nune’e vizitasaun Papa Francisco hanesan bensaun ida ba Timor, bainhira amu Papa fila ita fiar katak iha ita-nia rai sei iha dame no páz,” Nia hatutan.
Iha parte seluk, Pastór Evanjelika Asembleia De Deus, Loco-Loco, suku Matahoi, postu Uatulari, munisípi Viqueque, Celestino Pinto, reforsa ho vizita Sua Santidade Papa Francisco, sai motivasaun ba povu Timor Leste hodi konstrui unidade, páz hodi dezenvolve Timor-Leste ida di’ak liu iha futuru.
“Vizita Papa Francisco Timor ne’e lori páz tanba vizita ida-ne’e hodi halo orasaun ba povu Timor Leste, atu labele iha problema, Timor Leste tenke ba oin, ita halo orasaun ba lider nasaun nian, atu lori povu ba oin, labele halo terus tán povu,” nia dehan.
Nia observa katak vizita Amu Papa nian ne’e mos sai lisaun ba lider sira ne’ebe oras ne’e kaer ukun, atu oinsa servi povu ho simplesidade hodi liberta povu husik kiak
“Dadauk ne’e ami haree povu balun sei tanis, balu sei terus, ida-ne’e maka ami preokupa, maibé ami halo misa ba nain ulun sira hodi lori nasaun ne’e ba oin,” nia akresenta.
Jornalista : Vitorino Lopes da Costa
Editór : Florencio Miranda Ximenes
