Sarani Baucau partisipa misa solene ho esperansa hetan bensaun husi Papa Francisco
BAUCAU, 10 setembru 2024 (TATOLI) – Peregrinu sira husi munisípiu Baucau entuziasmu hodi partisipa misa solene tanba iha esperansa hodi hetan grasa bensaun husi Papa Francisco.
Padre Benediktus Random, hateten, sarani vigadaria Baucau sira-nia reasaun espontánia hatudu entuziasmu boot tanba ho prezensa iha Tasi-Tolu hatudu sentidu fiar ba Maromak liuhusi saseluk Papa Francisco.
“Hola parte misa ne’ebé prezide husi Papa ne’e hanesan grasa ba ita-nia moris, husi grasa ne’e ita manán,” Padre Benediktus Random informa ba Agência TATOLI iha Tasi-Tolu, Dili, tersa ne’e.
Maske organiza husi keiru relijiozu hamutuk ho autoridade lokál maibé sarani sira iha vontade rasik tanba konsidera Papa Francisco nia prezensa sei fó bensaun ba moris espirituál.
Padre Parókia São José Vila Nova ne’e, realsa, tema importante husi selebrasaun misa solene mak fiar nu’udar kulturál ne’ebé iha sentidu hanesan naturál entre ema ho Maromak tanba ne’e presiza atu transforma nu’udar kustume ba moris loro-loron nian.
Ensensiál prezensa Papa mak fiar sai hanesan kultura iha rai doben Timor-Leste nune’e tenke halo reflesaun ba pesoál idak-dak nian nune’e bele hetan grasa liuhusi bensaun Papa Francisco iha misa solene.
“Razaun fundamentu mak sarani sira iha fiar, ne’e ita haree liuhusi entuziasmu hodi hola prezensa iha-ne’e,” Padre Benediktus Random akresenta.
Vise Prezidente Komisaun Organizadora Munisipál atúal Padre Parókia Santo António, Padre Manuel Ximenes, SDB, husu sarani husi Baucau atu aproveita oportunidade hodi aprofunda fiar hodi manán grasa husi bensaun Papa Francisco.
“Papa mai tanba ita, ita iha mak nia mai tanba ne’e presiza agradese ba Maromak tanba katak fo ema-ne’ebé sai viagáriu Kristu nian,” Padre Manuel Ximenes hateten.
Prezensa Papa Francisco iha Timor-Leste reforsa liután sarani Katólika nia fiar hanesan moris tuir kultura hodi integra iha moris nune’e sai hanesan sidadaun onestu no espiritualmente.
Husi observasaun Agência TATOLI iha terrenu nota, sarani vigadaria Baucau hahú tama iha kampu Tasi-Tolu iha dader oras 07:00 no kontinua kedas ba fatin definitivu hodi partisipa misa solene iha Tasi-Tolu, Dili.
Tuir dadus munisípiu Baucau rejista sarani sira hamutuk rihun 15-resin ne’ebé maihusi postu administrativu neen no suku 59.
Jornalista : Natalino Belo
Editór : Evaristo Soares Martins
