DILI, 10 Setembru 2024 (TATOLI) – Entuziamu povu Timor-Leste nian atu partisipa misa iha Tasi-Tolu maka’as, tanba país ne’ebé nia povu maioria katólika daudaun ne’e nadodon ona bá fatin hodi hein Papa Francisco atu selebra misa.
Tanba ne’e sarani husi kada parókia konsentra ona Tasi-tolu atu partisipa misa solene ne’e, liuliu atu simu bensaun no rona mesajen ne’ebé Papa sei hato’o hela ba timoroan sira.
João de Deus, joven husi Balide lakohi lakon oportunidade iha misa ne’e tanba tuir nia, ida ne’e hanesan osan-mean ida no prezesa Papa iha Timór ne’e reprezenta Maromak nia fatin. Tanba ne’e, nia hola parte iha misa solene atu rona direta mensajen ne’ebé Papa atu hato’o ba timoroan sira no simu bensaun mós.
“Banhira ha’u rona Papa atu mai vizita ita-nia nasaun, ha’u prepara ha’u-nia aan hodi partisipa iha atividade ohin no aban ne’ebé Papa sei halo”, nia dehan iha Igreja Imaculada Conceição, Balide, ohin.
Ba nia, maske rai manas, maibé ne’e hanesan grasa ida, tanba Papa Ninia vizita ida ne’e hanesan milagre ba timoroan hotu.
Nia lembra katak vizita Papa nian mai Timór ne’e ba dalarua ona, ida iha tempu okupasaun Indonézia no agora iha ukun-aan.
Aleinde ne’e, Rolando Filipe mós haktuir katak nia prezensa iha misa ne’e ba dalarua ona, tanba antes ne’e iha primeira vizita Papa João Paulo II no agora partisipa tan iha vizita Papa Francisco nian.
“Ha’u hanesan sarani ida, ha’u-nia obrigasaun maka partisipa hodi simu bensaun husi Papa no rona saida maka Papa sei husik hela ba sarani Timor iha Tasi-tolu”, nia espera.
Iha tuku 16h30 lorokraik, Papa Francisco sei prezide misa solene iha Tasi-Tolu ne’ebé tuir planu sei partisipa husi sarani sira hamutuk rihun 200-resin ne’ebé mai husi dioseze Dili, Baucau no Maliana, inklu peregrinu sira husi Nusa Tenggara Timur (NTT)-Kupang-Indonézia no Austrália. Tuir planu, misa ne’e la’o durante oras ida ho balun de’it no sarani sira simu komuñaun kala la’o minutu 10 nia laran.
Jornalista: Tomé Amado
Editora: Maria Auxiliadora
