SINGAPURA, 11 setembru (TATOLI) –Papa Francisco ho nia delgesaun arranka husi aeroportu internasional Nicolau Lobato maizumenus tuku 12:25 lokraik oras Timor-Leste no to’o ona iha aeroportu Internasional Changi, Singapura tuku 2:52 lokraik, oras Singapura nian, ho susesu.
“Ami tún ona iha aeroportu Changi, 2:52 oras Singapura nian (oras Timor 3:56),” Filomena Martins hato’o reportajen badak bainhira Aero Dili aterra iha aeroportu internasionál Singapura, kuarta ne’e.
Líder Igreja Katólika Mundiál ne’e husik povu Timor-Leste ho Aero Dili ho númeru voo A320 hodi kontinua hala’o viajen apóstolika bá Singapura.
Durante voo, Papa Francisco ho jornalista na’in-85 husi aeroportu Nicolau Lobato’o to’o aeroportu Singapura, Changi, ho distánsia kilómetru 200.
Hafoin viajen besik oras haat nia laran ho Aviaun Aero Dili, Papa Francisco ho nia delegasaun, inklui jornalista 85 simu direta husi Ministrun Kultura, Komunidade no Joven, Edwin Tong, no komunidade Jezuita Singapura nian.
Durante Papa ninia vizita iha Singapura, sei toka kona-ba asuntu globál hanesan imigrasaun no pobreza. Santu Padre mós sei ko’alia ho líder polítiku no relijioza sira kona-ba relasaun bilaterál entre Vatikanu ho Singapura, hametin fé foinsa’e katóliku no seluk.
Tuir reportajen ne’ebé reporta husi Jornalista Agência TATOLI, Filomeno Martins, katak hafoin serimónia ofisial, Santu Padre hakat kedas ba Saint Francis Xavier Retreat Center ho deskansa no hala’o enkontru privada ho Komunidade Jejzuita Singapura iha tuku 6:15 lokarik oras Singapura nian.
Iha loron daruak, Santu Padre sei marka prezensa serimónia benvinda iha Parlamentu Nasionál Singapura, maizumenus tuku 9 dadeer. Hafoin enkontru referida, Santu Padre sei halo vizita kortezia ba Prezidente Repúblika Singapura, Tharman Shanmugaratnam iha tuku 9:30 no hasoru malu mos ho Primeiru Ministru, Lawrence Wong iha tuku 9:55 dader.
Enkuantu iha tuku 10:30, Sua Santidade sei hala’o enkontru ho autoridade, sosiedade sivíl no korpu diplomátika sira, iha Sentru Kultural Universidade National Singapura. Iha tuku 12 meudia, Santu Padre sei hala’o mós enkontru privadu ida ho Eis Primeiru Ministru Singapura iha Saint Francis Xavier Retreat Center. Iha parte lokraik, Santu Padre sei selebra ninia Misa Solene ikus antes viajen hikas ba Roma iha loron 13 setembru.
Notísia relevante: Papa Francisco husik ona Timor-Leste ho Aero Dili
Jornalista: Natalino Olderico da Costa
Editór: Evaristo Soares Martins
