Governu-Igreja felisita povu TL ba susesu vizita Papa Francisco
DILI, 11 setembru 2024 (TATOLI) – Primeiru-Ministru,Kay Rala Xanana, Gusmão, kuarta ne’e, hasoru malu ho Reprezentante Santa-Sé iha Timor Leste, Marco Sprizzi, Dom Virgílio Kardeál do Carmo da Silva hodi felisita povu Timor-Leste ne’ebé kontribui maka’as hodi fó susesu vizita Sua Santidade Papa Francisco iha Timor-Leste durante loron tolu.
Tanba ne’e, parte rua konsidera povu nasaun ne’e, hadomi pás no kontribui ambiente hakmatek durante Papa iha Timor-Leste.
Situasaun ne’e sai hanesan orgullu bo’ot ba Estadu no Igreja Katólita Timor-Leste, tanba povu liu-liu joven sira hatudu pás no domin boot bá ulun bo’ot Kreda nian iha Timor-Leste.
“Sira mai hasoru-malu ho Governu, la’ós atu agradese malu maibé hamutuk felisita tanba ho servisu hamutuk mak sai susesu bo’ot ida. Ita atu felisita karik felisita povu ne’ebé ho laran tomak to’o iha Dili desde tersa kalan tomak aguenta iha Tasi-Tolu,” Xanana Gusmão hateten ba jornalista sira hafoin remata enkontru.
Xefe Governu dehan, felisita liu mak joven sira tanba hatudu komportamentu di’ak tebtebes, hatudu katak timoroan sira bele kria nafatin armonia, laiha violénsia, hatudu domin, hametin fraternidade umana bele sai realidade iha nasaun ne’e.
Iha fatin hanesan, Arsebispu Arkedioseze Dili, Dom Virgílio Kardeál do Carmo da Silva, SDB, akresenta, hasoru-malu ho parte Governu hakarak fahe ksolok ba malu tanba durante ne’e kolabora hamutuk hodi fó susesu bá eventu boot ne’e.
“Ksolok ne’ebé ita hetan loron hirak ne’e tanba povu no joven ninia maturidade. Ema hotu-hotu hosi ki’ik to’o bo’ot, buat furak ne’e mundu haree tanba ema esforsu hotu-hotu nian. Tanba ne’e Governu ho Igreja hakarak felisita sarani Timor tomak. Hanesan Amu Papa dehan, igreja mak povu, nasaun mak povu ne’ebé tane a’as povu,” Dom Virgílio dehan.
Ho maturidade, servisu hamutuk, terus hamutuk iha loron manas nia laran durante loron tolu, ulun bo’ot kreda Timor ne’e konsidera hanesan aktu ida kompaisaun sarani Katólika Timor iha ninia unidade ho Ierarkia Igreja Universál.
Sua Santidade Papa Francisco vizita ona Timor-Leste durante loron tolu, hosi loron 09 to’o 11 setembru 2024. Ohin kontinua hala’o vizita Apostólika bá nasaun Singapura.
Jornalista: Hortencio Sanchez
Editór: Florencio Miranda Ximenes
