DILI, 11 Setembru 2024 (TATOLI) – Komunidade sira kontinua entuziasmu hodi hein bensaun husi Papa Francisco iha Portu, Dili nia oin.
Domingas Pereira, komunidade husi bairru Surik-Mas, suku Bairru Bité, akompaña ho família, hein bensaun ikus husi Papa iha Portu, Dili. “Desde nia to’o mai, ami nunka sente kolen hodi hein Papa hodi hetan bensaun. Santu Padre la’os mai beibeik, maibé lori tempu naruk mak nia mai vizita ita-nia rain. Ami orgullu tebes”, konta Domingas Pereira ba Tatoli.
Nia lembra fali katak nia ho nia família sira hotu horsein ba partisipa misa iha Tasi Tolu, Dili hodi hetan grasa Maromak ninian.
Iha fatin seluk, Avenélia da Costa Cardoso, akompaña husi nia oan feto na’in-rua, hatene maske Papa husik Timor-Lestre, sente kontente ho nia prezensa, tanba maioria timoroan katólika.
“Ha’u sente triste, tanba ohin nia fila ona, maske nia idade bo’ot ona, nia sei iha vontade hodi mai vizita ita nia rai Timor Lorosa’e. Ha’u nia esperansa mak nia fila ba nia fatin ho di’ak karik iha tempu di’ak ruma bele mai vizita fali ita nia rai”, nia haktuir.
Tuir observasaun husi Tatoli, Polísia Nasionál Timor-Leste no eskutériu sira kontinua garante seguransa iha dalan sira.
Jornalista: Afonso do Rosário
Editora: Isaura Lemos de Deus
