DILI, 11 setembru 2024 (TATOLI)—Santu Padre Papa Francisco apela ba reprezentante juventude husi dioseze Dili, Baucau no Maliana hamutuk 3.000 ne’e, tenke aprende valór fraternidade hodi haree malu hanesan amun-alin.
“Ikus liu, molok ha’u bá, valór ida-ne’ebé imi tenke apreende liután ne’e mak fraternidade. Imi sai maun-alin no la’ós sai inimígu ba malu,” Papa hato’o iha diskursu bainhira hala’o enkontru no joven timoroan iha Sentru Konvensaun Dili (CCD, siglá portugés), kuarta ne’e.
Papa Francisco hateten, inan-aman no avó sira bele iha ideia diferensa maibé sira hamutuk nafatin.
“Ha’u husu joven sira, imi iha ideia diferensa ka lae no ideia diferensa ne’e atu halo saida. Respeita malu. Bele iha ideia diferensa, relijiaun la hanesan maibé presiza respeita malu,” nia hateten.
Papa hateten, ódiu ne’e la’ós atetude ida di’ak ka aat maibé domin ba serbisu ida-ne’e mak atetude loloos.
Ba sira-ne’ebé baku malu, nia dehan, buat ne’ebé sira presiza tenke halo mak rekonsilia malu, tanba moris ne’e presiza domin no rekonsiliasaun.
“Buat ne’e iha imi-nia rai la akontese, maibé iha rai sira seluk akontese, iha ema buli malu. Iha ne’e iha ka lae. Buli ne’e atetude ida-ne’ebé aproveita ema seluk nia aan. Ema seluk tanba ema ne’e isin boot no oin aat, maibé sempre aproveita ema seluk nia aan. Hahú ohin ba oin, laiha tan buli iha Timor-Leste,” nia dehan.
Amu Papa husu foinsa’e sira atu sai erdeiru (erans; warisan) ema-ne’ebé kontinua istória di’ak husi ema sira-ne’ebé la’o uluk ona, lori ida-ne’e ba oin tenke iha korajen tanba se imi baku malu ne’e buka dalan atu hadame malu.
“Ha’u agradese imi hotu, ba buat hotu ne’ebé imi halo ba imi-nia rai no ba imi-nia kreda, ita hotu buka atu hakat liu diferensa sira-ne’ebé ita iha. Rekonsiliasaun no hatene moris hamutuk ho ema seluk iha diferensa nia laran,” nia dehan.
Antes termina, Amu Papa iha konsellu ida ba foinsa’e sira mak dahuluk kontinua halo barullu bara-barak, daruak respeita no rona ema katuas-ferik sira.
“Na’in Maromak haraik bensaun ba imi hotu no obrigadu ba imi-nia prezensa,” Papa hateten.
Jornalista : Nelson de Sousa
Editór : Cancio Ximenes
