Peregrinu na’in-6.261 husi Viqueque husik ona fatin konsentrasaun iha Hera
DILI, 11 setembru 2024 (TATOLI)- Peregrinu husi munisípiu Viqueque rihun 6.261, kuarta ne’e, husik ona fatin akampamentu iha aldeia Mota Ki’ik, Hera, postu administrativu Cristu Rei ba munisípiu Viqueque hafoin partisipa misa solene husi Sua Santidade Papa Francisco iha Tasi-Tolu.
Ekipa avansadu munisípiu Viqueque, Marito da Costa, relata, peregrinu sira hahú halot sira-nia sasán ba karreta atu fila ba munisípiu Viqueque.
“Ami orienta ita-nia peregrinu prepara sira-nia sasán ba karreta laran, bainhira sira aruma hotu sasán tuku 08:00 ita bele sai husi ona Hera”, Marito da Costa, hateten ba Agênsia Tatoli, iha Hera, ohin.
Peregrinu husi munisípiu Viqueque totál hamutuk rihun 6.261 mai husi postu administrativu lima kompostu postu Viqueque rihun 2298, Ossu na’in-956, Uatulari rihun 1.471, Uatucarbau na’in-522 no Lacluta rihun 1.014 sai dala ida.
“Peregrinu sira-ne’e ami sei sai dala ida, depois to’o Viqueque maka ba postu ida-idak. Ami mós hakarak relata ba públika katak ita-nia peregrinu sira-ne’e mak ho kondisaun di’ak hotu no agora sira fila mós kondisaun di’ak. Kona-ba peregrinu na’in tolu ne’ebé horikalan depois misa solene hotu atu fila maka la’o sala dalan ne’e, ami hetan hotu ona, agora sira sa’e hotu karreta fila ba Viqueque”, nia hato’o.
Tuir dadús transporte ne’ebé transporta peregrinu sira husi munisípiu Viqueque totál hamutuk unidade 128.
Entretantu, iha viajen ne’e hetan akompaña husi Polísia Nasionál Timor Leste (PNTL) munisípiu Viqueque no komisaun organizadóra munisípiu Viqueque.
Jornalista : Vitorino Lopes da Costa
Editór : Florencio Miranda Ximenes
