BAUCAU, 11 setembru 2024 (TATOLI) – Peregrinu rihun 15-resin to’o hikas iha Baucau nune’e Padre Parokia Santo António husu sarani sira halo-tuir mensajen Papa Francisco iha moris prátika loro-loron nian.
Peregrinu sira husik hela Dili hafoin remata partispa misa solene iha Tasi-Tolu purvolta oras 21:00 no to’o iha Baucau ho kondisaun di’ak, maske iha karreta balun aat maibé konsege rezolve ho maneira transfere ba karreta seluk.
Padre Parókia Santo António Vila antiga, Padre Manuel Ximenes, SDB, hateten, grupu koru, ministra extraordináriu hamutuk joven sira mak kontinua fila ba Baucau hafoin Papa Francisco husik hela Timor-Leste iha meodia ne’e.
Vise Prezidente Komisaun Organizadora Munisipál Baucau, fo mensajen ba sarani atu moris tuir mensajen Papa Francisco hanesan aprofunda fiar, respeita malu, fó atensaun ba labarik no idoza sira.
“Buat-ne’ebé ita rona la’ós sai husi tilun sorin karuk no loos maibé koko atu moris tuir tanba ita hetan grasa bensaun husi vizita Papa nune’e tenke hakaas aan,” Padre Pároku Parókia Santo António, Vila Antiga informa ba Agência TATOLI, kuarta ne’e.
Padre Manuel, husu atu relijiozu sira aplika tuir mensajen Papa kona-ba hamorin ba Kristu hanesan ai-kameli nia morin liuliu iha nasaun no sosiedade.
Peregrinu husi vigadaria munisípiu Baucau to’o Dili iha loron-09 setembru hodi partisipa misa solene iha Tasi-tolu ho totál rihun 15-resin kompostu husi postu administrativu neen no suku 59.
Jornalista : Natalino Belo
Editór : Evaristo Soares Martins
