Sarani nahe tais Timor iha estrada hodi hatudu domin ba Amu Papa Francisco
DILI, 11 setembru 2024 (TATOLI)- Sarani Timor-Leste nahe tais Timor iha estrada hodi Sua Santidade Amu Papa Francisco hodi hatudu domin no agradese ba vizita pastoral mai Timor-Leste , durante loron 9 to’o 11 setembru 2024.
Sarani hanesan tais nain husi munisípiu Ermera, Esmaila de Carvalo, espresa tais ne’ebé nahe iha estrada leten hanesan simbolu domin ba Sua Santidade Papa Francisco.
“Maske amu Papa ho karreta liu de’it tais leten mós ami kontente. Nu’udar sarani katóliku ami sente orgullu tanba bele haree direta Papa Francisco”, Esmaila de Carvalo, ba jornalista Agência Tatoli, iha ponte Comoro, ohin.
Esmaila hatutan, tais hanesan kultura Timor nian dala barak tara ba inan Nosa Senora nune’e ba vizita Papa Francisco nahe iha estrada hodi Papa la’o iha leten.
“Tais ne’e, ha’u foti rasik ami-nia husi Ermera ne’ebé ohin nahe iha estrada. Tais ne’e ha’u foti fila-fali hodi lori ba uma sai hanesan memoria ida ba ami-nia família sira”, nia espresa.
Nune’e nia husu, Maromak akompaña Amu Papa Francisco hodi viajén to’o fali nian fatin ho isin di’ak.
“Tanba bele mai vizita ona ami-nia nasaun Timor Leste, durante loron tolu no halo misa ba sarani sira iha Timor”, nia hato’o.
Iha fatin hanesan, Tais na’in husi munisípiu Viqueque, Rosalina M. Pereira, haktuir tau tais iha estrada atu Papa Francisco sama hodi hetan grasa husi amu Papa Francisco
“Tais ne’e Amu Papa sama tiha iha leten, ha’u foti fali ba uma hodi oan sira moras karik bele taka tais ba oan sira. Tanba Papa mai hela de’it, maibé mai Timor lori tinan naruk, nune’e tais ne’e sai memoria ba beioan sira”, nia afirma.
Tuir observasaun jornalista Agência Tatoli nota katak molok Sua Santidade Papa Francisco sarani idaidak nahe sira nian tais Timor iha estrada leten, nune’e karreta ne’ebe tula Amu Papa Francisco konsege sama sarani sira nain tais ne’ebé nahe iha estrada parte ponte Comoro.
Jornalista : Vitorino Lopes da Costa
Editór : Florencio Miranda Ximenes
