DILI, 11 Setembru 2024 (TATOLI) – Sarani sira kontinua hamriik iha estrada públiku, iha kapitál Dili hodi despede ho Santo Padre ne’ebé termina nia viajen apostólika no Estadu durante loron tolu iha Timor-Leste.
Amélia da Costa Cardoso, sarani ida husi Bebora, ne’ebé hamriik iha estrada públiku besik Kampu Futsál Bebora hein hodi halo despedida bá Papa Francisco ne’ebé ohin husik ona Timor-Leste.
“Papa atu fila ona ha’u sente laran moras los, tanba ida ne’e hasoru malu ikus nian ona, ita la hatene aban bainrua nia mai fali, ha’u sei iha ka la’e?”, infórma ba Tatoli iha Bebora Dili.
Amélia da Costa Cardoso hatete durante loron tolu Santu Padre iha Timor-Leste, bele lori domin no dame mai timoroan hotu nuune’e labele akontese tan problema entre joven sira.
“Ita reza atu ita nia joven sira bele hetan bensaun husi Maromak no dejeza bá Amo Papa nia viajen ne’ebé la’o ho di’ak no Maromak akompaña nia to’o Roma ho kondisaun di’ak”,
Iha Fatin hanesan, Francisco Menezes hatete prezensa Santo Padre Papa Francisco hanesan previléjiu bo’ot ida ba nia, tanba ba dala-rua ona nia bele asiste líder Igreja Katólika mai Timor-Leste hafoin Papa São Paulo II nia vizita iha tinan 1989.
“Vizita hanesan previléjiu ba ha’u no ba oan sira no hanesan grasa ida, tanba Maromak bele fó iis moris mai ha’u hodi assiste tan vizita Santu Padre mai iha ita nia rai doben ki’ik ida ne’e ba dala-rua, maske do’ok nia buka meiu ho nia saúde ida hanesan ne’e, maibé halo viajen ida ne’ebé do’ok tebes mai ita-nia rai hodi haree nia emar sira no fó bensaun mai ita nia rai doben Timor-Leste”,
Francisco Menezes espera ho vizita Papa Franciso bele enkoraja no motiva timoroan hotu atu servisu hamutuk hodi bele moris di’ak liu tan hodi dezenvolve país ida ne’e.
Notísia relasionada: Komunidade kontinua entuziasmu hein bensaun husi Papa
Jornalista: Afonso do Rosário
Editora: Isaura Lemos de Deus
