DILI, 11 setembru 2024 (TATOLI)—Sua Santidade Amu Papa Francisco husu joven sira atu kuida labarik no ferik ho kataus sira tanba sosiedade ida nia osan-mean mak labarik no ferik ho katuas sira.
Santru Padre hateten, joven sira-nia moris ne’e to’o iha dalan klaran entre moris labarik no ema katuas no ferik nian, no imi hatene saida mak rikusoin furak liu iha sosiedade ida-ne’e nia laran, ne’e mak ema katuas-ferik sira no avó sira.
Iha moris rohan ida, nia dehan, iha labarik sira no rohan seluk iha katuas no ferik maibé sira mak katuas no ferik ne’e mak fó matenek sabedória ba joven sira.
“Imi sira-ne’e respeita katuas no ferik sira ka lae. Ema katuas no ferik sira husik hela nafatin istória ba foinsa’e sira. Iha sosiedade ida nia osan mean mak labarik sira no katuas ho ferik sira. Agora imi repete, saida mak osan mean boot rua iha sosiedade ida, labarik no ferik ho katuas sira. Tanba ne’e sosiedade ida iha labarik barak hanesan ita nian ne’e, tenke kuida didi’ak labarik sira no iha katuas no ferik sira-ne’ebé mesak memória sosiedade nian. Tanba ne’e, tenke respeita no tau matan ba sira,” Amu Papa hateten iha nia diskursu bainhira hala’o enkontru ho joven timoroan iha Sentru Konvensaun Dili (CCD, siglá portugés), kuarta ne’e.
Amu Papa konta istória ida, iha família ida, sira han hamutuk aman-inan no oan no avó sira ne’ebé idózu liu, entaun avó ne’e idade loos ona, liman nakdedar han mós susár, entaun ninia aman deside tau meza ki’ik ida iha dapur atu avó ne’e haan iha dapur de’it.
“Apa ne’e esplika katak, tau sees tiha nia ba dapur, agora ita bele konvida bainaka sira mai han hamutuk la halo moe ita iha uma laran. No, loron ida, nia Apa fila hetan nia oan ki’ik-oan tinan lima ne’e halimar hela ho ai, no apa husu ba labarik ne’e; ‘ó halo saida ho ai ne’e’. Ha’u halo meza ida, ne’e ha’u halo ba Apa ne’e para apa aban bainrua katuas, ha’u tau sees tiha hodi han ketak,” Papa haktuir.
Ho mensajen husi istória ida-ne’e, Papa Francisco husu ba joven sira-ne’ebé partisipa iha enkontru ida-ne’e, atu saida mak osan-mean rua importante liu iha sosiedade ida mak labarik kiik ho ferik no katuas.
“Favór ida tau matan ba labarik sira no katuas no ferik sira,” Papa Francisco apela ba juventude sira.
Jornalista : Nelson de Sousa
Editór : Cancio Ximenes
