DILI, 12 setembru 2024 (TATOLI)—Ministériu Transporte no Komunikasaun (MTK) liuhusi Diresaun Nasionál Transporte no Terrestre (DNTT) daudaun ne’e kria ona regulamentu hodi regula tum-tum ne’ebé oras ne’e kontinua halo movimentu husi Tibar to’o uma-adat Tasi-tolu.
“Loos, públiku sempre kestiona tum-tum ne’ebé halai husi Tibar to’o Tasi-tolu, sira barullu hamosu engarafamentu maibé ita atu hapara tenke bazeia ba regulamentu ruma hodi kesi sira, nune’e provizóriu ita la hapara sira-nia movimentu maibé agora ita mós esforsu halo ona regulamentu atu regula sira, maibé desizaun atu hasai regulamentu seidauk iha data loloos,” Xefe Departamentu Sekretariadu Apoiu Tékniku Administrasaun DNTT, Nelson Sequeira Martins, infoma ba Agência Tatoli iha ninia knaar-fatin, Balide, kinta ne’e.
Notísia relevante : Governu hapara provizóriu importasaun tum-tum
DNTT prepara hela hodi tum-tum bele regula husi Liquiçá to’o Rotunda Tibar, no la liu Tasi-tolu.
“Bainhira sira kontra sei hetan sansaun. Daudaun ne’e ita prepara hela sansaun sira,” nia akresenta.
Antes ne’e, DNTT hapara uluk importasaun tum-tum iha outubru tinan kotuk, ho razaun labele aumenta númeru transporte ne’e tanba na’in ba tum-tum ne’e balun hatama rejistu halo deklarasaun atu halo de’it operasaun iha munisípiu sira, maibé ikus mai to’o
Dili.
“Ita rejista tum-tum hahú importa to’o agora hamutuk 1.345, iha janeiru to’o setembru 2023 ita rejista 817. Maibé hahú hapara importasaun outubru tinan kotuk sa’e mai to’o agora,” nia tenik.
Jornalista : Arminda Fonseca
Editora : Julia Chatarina
