DILI, 12 setembru 2024 (TATOLI)–Diretór Ezekutivu Aero Dili, Lourenço de Oliveira, sente kontente liu tanba sua Santidade Papa Francisco hili São Miguel Arcanjo sai protetór voo aero Dili nian.
Notísia Relevante: Aero Dili aterra ona Papa Francisco iha Singapura ho susesu
“Amu husik taka imajen Nossa Senora no meninu Jesus husik iha vidru oin aviaun Aero Díli nian,” Diretór Ezekutivu, Lourenço de Oliveira, hateten ba jornalista sira, iha Timor Plaza.
Nia hateten, nia parte sente orgullu no onradu tanba ekipa Vatikanu no Governu timorense bele hili aviaun Aero Dili hodi tula Amu Papa ba Singapura atu kontinua hala’a vizita pastorál ikus nian to’o 13 setembru 2024.
“Ha’u sente onra ida orgullu tebe-tebes, bainhira ita-nia Governu no ekipa Vatikanu hakarak Aero Díli mak tenke tula Papa ba Singapura. Ha’u sente orgullu tebes no onradu, tanba Maromak fó dalan, maske ita foin iha aviaun ida, ita bele Lori fila amu ba to’o Singapura ho susesu,” Diretór Ezekutivu, Lourenço de Oliveira, hateten ba jornalista sira, iha Timor Plaza.
Nia konsidera, vizita amu Papa nian sai susesu boot ida liuhusi Governu no sarani tomak nia esforsu durante loron tolu Papa Francisco hala’o vizita pastorál iha Timor-Leste.
“Ita konsege susesu duni ba esforsu no komisaun organizadora ba vizita amu Papa,” nia dehan.
Mensajen amu Papa ba aero Dili
Jestor ne’e hateten, na’in ba ba Aero Díli no nia ekipa sua Santidade Papa bolu hotu kedas hodi simu bensaun iha aviaun Aero Dili nia laran.
“Ami tau banku ki’ik ida besik amu Papa, la’ós ha’u mesak maibé husi pilotu to’o mekániku sira, tur iha nia sorin husu bensaun ba Papa. Ba Aero Dili amu Papa mós hakerek mensajen agradesimentu ida ba ami, ne’e ha’u fo ita-boot sirs bele publika ba, tanba amu Papá rasik mak hakerek ho liman,” nia hateten.
Mensajen agradesimentu ne’ebé Papa Francisco ba livru onra ka bainaka Aero Dili nian mak hanesan; “Ba imi hotu no imi idakiadak membru Aero Díli nian hau Agradese ho profisionalizmu ba kortezia no simpatia-ha’u hakarak ba imi hotu! Maromak fó bensaun-Smaile! Smile! Smile! Francisco”.
Nia hateten, jestu amu Papa Francisco nian hatudu ba ema hotu simplisidade ida-ne’ebé hanorin ba ema hotu hodi bele moris banati.
Notísia Relevante: Papa Francisco husik ona Timor-Leste ho Aero Dili
Jornalista : Jesuína Xavier
Editór : Cancio Ximenes
