DILI, 15 Janeiru 2026 (TATOLI)–Ministériu Justisa (MJ) liuhusi Diresaun Nasionál Servisu Rejistu Notariadu konklui ona prosesu akizisaun ba kaderneta pasaporte hamutuk rihun 75.
Diretór Nasionál Servisu Rejistu Notariadu, Agostino Gonçalves Viera, hateten, Governu tinan ne’e hakarak halo tan akizisaun ba kaderneta pasaporte, tanba ne’e prosesu hotu konklui ona nune’e hein empreza manda kaderneta mai.
“Hein distribuisaun atu mai de’it ona, Fevereiru laran mai uluk balun sei mai tan,” Diretór hato’o ba Ajénsia TATOLI iha ninia knaar fatin, Kolmera, Kinta ne’e.
Notísia relevante : Tribunál absolve arguidu na’in-haat ba kazu pasaporte lakon iha Notariadu
Pasaporte hamutuk 2.000 sei to’o Dili iha Fulan-Fevereiru ne’e no balun sei mai tan iha tinan ne’e nia laran.
“Ita kontrata nafatin empreza Theles hodi hodi halo produsaun ba ita-nia kaderneta pasaporte,” nia akresenta.
Pasaporte ne’ebé Governu halo akizisaun iha Fulan-Fevereiru sei iha balun.
“Ita iha stoke pasaporte ne’ebé ita akiza iha tinan kotuk bele nesesita ba fulan balun iha tinan ne’e tan. Hodi hein stoke pasaporte ne’ebé ita atu akiza tinan ne’e. Ho akizisaun kaderneta pasaporte ba tinan ne’e bele asegura povu nia nesesidade ba tinan-ida,” nia katak.
Jornalista : Natalino Costa
Editora : Julia Chatarina
