DILI, 22 Outubru 2025 (TATOLI)–Tribunál liuhusi desizaun Juíz Koletivu Zulmira Auxiladora, Argentino Nunes, Ivan Patrocino Suritai absolve arguidu na’in-haat ba kazu pasaporte 20 lakon iha Notariadu iha tinan 2016 inklui sidadaun estrajeiru bele utiliza pasaporte serbisu Timor-Leste hodi halo serbisu iha rai-li’ur.
Ministériu Públiku (MP) akuza arguidu SPSF, JS, AA no VCN nu’udár autór ba materiál krime administrasaun danoza tuir artigu 274 husi Kódigu Penál Timor-Leste tanba arguidu sira livremente deliberada hala’o aktu ne’e no hatene katak hahalok ne’e krime maibé sira la preokupa hodi hamosu konsekuénsia.
Tanba falta kontrolu no laiha jestaun di’ak ba serbisu no interrese Estadu hodi hamosu sidadaun estrajeiru bele utiliza pasaporte serbisu Timor-Leste hodi halo serbisu iha rai-li’ur.
Tribunál Judisiál Pimeira Instánsia Dili (TJPID) iha Kuarta ne’e, deside katak hafoin halo tiha julgamentu ba kazu ne’e, to’o ikus haree faktu sira ne’ebé MP aprezenta mai Tribunál inklui bazeia ba depoimentu sira husi arguidu nomós sasin sira-nia, maka la provadu katak arguidu na’in-haat komete krime ne’ebé MP imputa.
Notísia relevante : Tribunál kontinua halo julgamentu ba kazu pasaporte lakon iha Notariadu
Nune’e, Tribunál deside absolve arguidu sira husi krime administrasaun danoza tanba faktu la provadu katak arguidu mak envolve direta iha krime ne’e.
Hafoin Tribunál lee sai tiha akordaun ba kazu ne’e, husu kedan ba MP ne’ebé reprezenta husi Prokuradora Lídia Soares hodi halo rekursu bainhira la konkorda ho desizaun Tribunál.
MP tuir lei iha prazu loron-30 hodi hato’o rekursu hodi kontesta ba desizaun husi TJPID.
Jornalista : Natalino Costa
Editora : Julia Chatarina
