DILI, 04 Abríl 2025 (TATOLI)—Tribunál Judisiál Primeira Instánsia Dili (TJPID), sesta ne’e, kontinua halo julgamentu ba kazu pasaporte 20 lakon iha Diresaun Jerál Servisu Rejistu Notariadu iha 2016 ne’ebe envolve husi arguidu haat ho inisiál SPSF, JS, AA, VCN.
Iha audiénsia julgamentu ne’e, Tribunál rona depoimentu husi Diretór Jerál Servisu Rejistu Notariadu ho inisiál VCN.
Iha sala julgamentu laran, arguidu deklara katak faktu sira-ne’ebé Ministériu Públiku imputa ba nia ne’e iha balun loos no balun la loos.
“Momentu ne’ebá, ha’u asumi kargu hanesan Diretór Jerál Rejistu Notariadu no kona-ba termu entrega pasaporte serbisu ho númeru seriál hahú husi S0008001 to’o S00083300. Ida-ne’e ha’u iha koñesimentu. Kona-ba introdús númeru pasaporte bá iha sistema, ha’u laiha koñesimentu. Funsionáriu iha Departamentu Pasaporte mak hatene,” arguidu VCN tenik iha sala julgamentu Tribunál Judisiál Primeira Instánsia Dili, Kaikoli.
Notísia relevante: Tribunál julga kazu Kaderneta Pasaporte lakon iha Notariadu
Arguidu deklara, kona-ba kaderneta pasaporte lakon iha tinan 2019 ne’e arguidu laiha koñesimentu, tanba arguidu nia mandatu hanesan diretór termina iha tinan 2017, inklui sidadaun na’in-tolu ne’ebé utiliza Pasaporte Servisu arguidu laiha koñesimentu, banhira parte Inspesaun bolu ona mak nia foin hatene.
Arguidu deklara, Pasaporte Servisu ne’ebé sidadaun estranjeira na’in-tolu uza, ida-ne’e deskonfia pasaporte falsu no pasaporte tolu ne’e lai sai husi Diresaun Notariadu nian, tanba arguidu rasik hanesan diretór la asina.
Arguidu deklara, kaderneta ne’ebé kompañia hatama mai ne’e, mai kedas ho nia númeru, no kaderneta mai rai iha lojístika. Atu foti kaderneta pasaporte tenke iha pedidu eskrita ka verbál husi diretór mak funsionáriu sira bá foti, no bainhira foti kaderneta pasaporte sira-ne’e, tenke rejistu iha livru lojístika nian.
Arguidu hatutan, atu trata Pasaporte Servisu, baibain simu pedidu husi instituisaun mak foin bele trata, maibé kona-ba sidadaun na’in-tolu ne’e, iha arguidu nia mandatu seidauk simu pedidu ruma kona-ba ida-ne’e no arguidu laiha koñesimentu.
Arguidu esplika, tuir regra, Xefe Departamentu sira kada fulan tolu halo relatóriu ba arguidu, maibé momentu arguidu asumi kna’ar ne’e sira halo relatóriu, maibé iha relatóriu la ko’alia kona-ba pasaporte 20 lakon.
Arguidu deklara tan, kaderneta kuandu foti husi lojístika tau iha armáriu ida, no xave Xefe Departamentu mak kaer. Se Xefe Departamentu hala’o hela kna’ar ruma ka reuniaun ruma, bele entrega bá iha funsionáriu ne’ebé tau konfiansa ba.
Arguidu deklara, nunka asina pasaporte sira-ne’ebé lakon, inklui Pasaporte Servisu ne’ebé sidadaun na’in-tolu utiliza hodi hala’o viajen.
Kona-ba pasaporte ne’ebé lakon, arguidu VCN deklara katak laiha koñesimentu tanba la hetan kona-ba loron, oras, fulan no tinan ne’ebé lakon, maibé dehan de’it kaderneta pasaporte lakon. Tanba ne’e, arguidu mós laiha koñesimentu.
Hafoin rona tiha arguidu nia deklarasaun, Tribunál marka fali audiénsia julgamentu ba loron 23 Abríl 2025 dadeer hodi rona sasin sira.
Audiénsia julgamentu ne’e prezide husi juíz koletivu hanesan Zulmira Auxiliadora, Argentino Nunes, Ivan Patricinio Suritay Gonçalves, Ministériu Públiku reprezenta husi Prokuradora Lídia Soares, arguidu sira hetan asisténsia legál husi defensór públiku na’in-rua no advogada privada na’in-ida.
Jornalista: Natalino Costa
Editór: Xisto Freitas da Piedade
