DILI, 14 Janeiru 2026 (TATOLI)-Komisaun Funsaun Públika (KFP) halo ona promosaun antiguidade ba funsionáriu na’in-3.540 iha tinan 2025.
Promosaun ne’e foin dahuluk halo ba funsionáriu sira ne’ebé presta serbisu tinan barak ona, maibé la promovidu iha administrasaun públika ba rejime jerál no rejime espesiál.
Prezidente Komisaun Funsaun Públika, Agostinho Letêncio de Deus, hateten promosaun antiguidade ne’e baibain halo kada tinan haat depoizde funsionáriu sira tuir teste hodi promove ba grau tuirmai. “Maibé, ita haree realidade iha funsionáriu balun serbisu ona tinan ualu, 10 to’o 20, maibé nunka hetan promosaun”, nia afirma.
Tuir análize KFP, bainhira funsionáriu sira serbisu liu ona períodu rua to’o ona tinan ualu fó oportunidade promosaun antiguidade ba sira ne’ebé nunka liu teste. “Maibé, ida-ne’e la’ós la’os automátiku. Maski laiha teste, maibé sira tenke prienxe kritéria avaliasaun dezempeñu, formasaun no disiplina”, dehan.
Daudaun ne’e iha ona rezolusaun Governu no dekretu-lei kona-ba promosaun antiguidade ne’ebé sei halo iha kada tinan, maibé tinan kotuk la halo promosaun regulár no halo de’it promosaun antiguidade ba funsionáriu na’in-3.540.
“Tinan ida-ne’e, ita sei hala’o promosaun rua ne’e dala-ida, sira-ne’e la tuir ezame, maibé tuir de’it prosesu selesaun husi ekipa júri”, nia adianta.
Rekorde katak Governu aprova, iha tinan kotuk, projetu rezolusaun Governu ne’ebé estabelese vaga ba promosaun tuir antiguidade pesoál ne’ebé integra iha karreira Rejime Jerál Administrasaun Públika ba 2025.
Totál vaga promosaun hamutuk 3.540, ne’ebé estabelese husi rezolusaun Governu ida-ne’e, ne’ebé 60 aloka ba kategoria tékniku superiór hamutuk-Grau A, 223 ba Tékniku Superiór – Grau B, 561 ba Tékniku Profisionál 561- Grau C, 965 ba Tékniku Profisionál-Grau D, 1.051 ba Tékniku Administrativu – Grau E no 680 ba Asistente -Grau F.
Iha 25 Setembru 2024, Governu mós aprova projetu rezolusaun kona-ba vaga ba promosaun pesoál integradu iha rejime jerál karreira administrasaun públika ba tinan 2024.
Vaga sira ba promosaun ne’e fiksa ona tinan-tinan husi Governu, tuir proposta KFP to’o limite pursentu 10 husi totál pesoál sira iha kada kategoria ka grupu profisionál.
Husi totál vaga promosaun hamutuk 817 ne’ebé rezolusaun Governu ne’e estabelese, koloka 47 ba kategoria Tékniku Superiór 47 – Grau A, 122 ba Tékniku Superiór – Grau B, 188 ba Tékniku Profisionál – Grau C, 234 ba Tékniku Profisionál – Grau D, 149 ba Tékniku Administrativu – Grau E no 77 ba Asistente – Grau F.
Notísia relevante: KFP define promosaun antiguidade ba funsionáriu bazeia ba pontu tolu
Jornalista: Nelson de Sousa
Editora: Maria Auxiliadora
