SINGAPURA, 12 setembru 2024 (TATOLI) – Papa Francisco prezide misa solene ba sarani hamtuk 50,000 iha Estádiu Nasional Singapura. Misa Solene referida nu’udar misa ikus husi Santu Padre nia jornada apostólika ba ASEAN no Oseania.
Misa Solene ne’e hahú tuku 5:15, maibé sarani komesa tama estádiu hahú husi tuku 12 meudia to’o tuku tolu lorokraik.
Santu Padre loke ninia omilia ho liafuan ‘Domin’ hodi hateten “Singapura nu’udar nasaun dezenvolvida ida nakonu ho Nai Maromak Nia ‘Domin’.
Sua Santidade dehan, Singapura nakonu ho uma andar oioin tanba ninia povu fó domin tomak hodi harii nasaun ne’e. “Dalaruma ema haree ba andar sira ne’e, hanoin de’it mak osan, téknika no abilidade enjiñeiru. Maibé buat folin liu ita hetan husi ne’e mak “Domin” ne’ebé buras.”
“Maun-alin no inan-feton sira, buat di’ak ne’ebé eziste iha mundu ne’e la tan buat seluk, maibé tanba domin manan ódiu, solidaridade manan indiferensa, no jenerozidade manan egoizmu. Se la’ós domin karik, laiha ema ida mak bele harii sidade metropolitanu ne’e,” Santu Padre tenik.
Santu Padre fó hanoin hikas Sarani Singapura kona-ba São João Paulo II ninia omília iha 20 novembru 1986 bainhira nia prezide misa solene iha Estádiu Nasionál ne’e, “São João Paulo II hateten nune’e, ‘domin’ mak respeita ema hotu, la haree ba kór, rasa, no relijiaun.”
Papa Francisco dehan Singapura nu’udar nasaun riku ho kultura, rasa, no relijiaun oioin maibé laiha diskrimansaun ba kultura, rasa no relijiaun.
Kardeál William Seng Chye Goh, Arsebispu Singapura, iha ninia diskursu agradesimentu hateten Misa Solene ne’e importante tebes hodi hametin Sarani Singapura nia fiar.
“Ba ami, eukaristia ne’e mak importante liu hotu husi Santu Padre nia vizita. Tanba eukaristia ne’e halibur ami iha domin no fiar liuhusi Nai Jesus Kristu nia sakrifísiu. Ha’u hakarak espresa ha’u-nia agradese ua’in ba Santu Padre, ba ninia vizita pastorál ida ne’e mai Singapura. Obrigadu ua’in ban ita nia domin ne’ebé hatudu ona mai ami,” Kardeál Goh.
Hafoin rona Santu Padre nia omília kona-ba ‘domin’, Rosie Teo, nu’udar sarani ida marka mós prezensa iha misa ne’e hataten, “Ha’u kontente loos. Bainhira, hau rona dehan Santu Padre atu mai Singapura, ha’u senti hanesan ha’u atu tanis.”
“Ho Santu Padre nia prezensa, Singapura sei sai nasaun ida nakonu ho domin no dame hodi moris iha armonia no fraternidade. Nai Maromak Nia domin sempre halibur ema hotu,” Rosie espresa nia esperansa.
Daniel Simwandhi mós espresa nia sentimentu alegria ho Papa Francisco nia prezensa iha Singapura.
“Ami kontente tebes tanba Santu Padre bele mai vizita Singapura. Ida ne’e grasa boot ida ba ami. Ami nia esperansa mak dame no unidade,” Daniel dehan.
Amu Papa termina misa solene referida ihA tuku 6.49 lorokraik oras Singapura no hakat hikas ba Saint Francis Xavier Retreat hodi deskansa.
Santu Padre sei konklui nia vizita iha Singapura no arranka hikas ba Vatikanu iha loron 13 setembru 2024, tuku 11:50 dader no sei to’o iha Roma tuku 6:25 lorokraik.
Jornalist: Filomeno Martins
Editór: Rafael Ximenes de A. Belo
