PN apresia povu TL ba susesu vizita Papa Francisco

DILI, 12 setembru 2024 (TATOLI)—Deputadu membru komisaun B ne’ebé trata asuntu Negósiu Estranjeiru no Defeza ho Seguransa iha Parlamentu Nasionál (PN), Natalino dos Santos, apresia povu Timor-Leste tomak ne’ebé kontribui makaas hodi fó susesu ba vizita Sua Santidade Papa Francisco iha Timor-Leste durante loron tolu (09-11 setembru 2024) nia laran.
“Apresia haree entusiazmu populasaun nian ho mós susesu ida hanoin susesu povu ni’an, tanba ita-nia kultura ida dame, ne’ebé uluk kedas ita manán funu ho unidade nasionál enter timoroan. Ita konsege la haree asidente, laiha violénsia, ida-ne’e di’ak tebe-tebes ba kontribuisaun povu nian hodi fó susesu ba vizita Papa Francisco iha Timor-Leste,” nia hateten ba jornalista sira iha resintu PN, kinta ne’e.
Situasaun ne’e orgullu tebes ba povu tomak liuliu joven sira kontribui ambiente hakmatek hodi fó susesu ba vizita ne’e.
Membru husi órgaun lejislativu ne’e apresia mós serbisu PNTL ho F-FDTL ne’ebé fó seguransa másimu ba eventu boot ida-ne’e.
“Apresia ita-nia instituisaun rua defeza no seguransa F-FDTL ho PNTL nu’udar instituisaun atu garante seguransa, nune’e instituisaun rua ne’e profisional duni garante pás no estabilidade,” nia dehan.
Jornalista : Nelson de Sousa
Editór : Cancio Ximenes

