DILI, 12 setembru 2024 (TATOLI) – Prezidente Repúblika, José Ramos Horta, husu ba Governu atu koordena ho Igraja liuliu Konferensia Episkopál Timorense (CET-sigla portugés) atu tau orsamentu iha tinan 2025 hodi transforma Tasi-Tolu ba sentru relijiozu turístiku.
“Ha’u ko’alia ona ho Primeiru-Ministru atu nune’e koordena ho Konferénsia Episkopál atu tau kedan orsamentu 2025 nian atu halo manutensaun ba fatin Tasi-Tolu ne’e ba patrimóniu nasionál ida atu sai hanesan sentru relijiozu no sentru turístiku,” Horta hateten ba jornalista sira iha Palásiu Prezidensiál Dili, kinta ne’e.
Nia dehan, Tasi-Tolu labele abandona de’it nune’e, tenke dezenvolve sai furak ba mós sentru komunitáriu ba família, kria jardin furak oioin hodi kuda ai-oan hodi halo fatin ne’e sai matak no furak.
Alende ne’e, nia mós sei ko’alia ho Primeiru-Ministru atu tau planu hodi kria programa boot ida ba Juventude liuliu estudante sira.
“Tenke lansa fali programa ida uluk Governu anterior sira halo ona kada tinan ida tenke kuda ai-hun millaun ida, tanba antes ne’e programa ne’e lansa tia la konsege halo, entaun ba oin tenke halo ida ne’e, tenke mobiliza joven sira inklui mós arte marsiál sira,” nia tenik.
Tuir nia, programa seluk ne’ebé Governu presiza halo mak mobiliza joven sira hamoos lixu la’ós iha Dili laran de’it maibé iha territóriu nasionál tanba lixu domina iha Timor-Leste kuaze dalan ninin sira.
“Ida ne’e ita bele aproveita hodi mobiliza joven sira para halo ida ne’e durante ferias la halo buat ida tenke mobiliza sira depois fó netik osan ruma ba sira,” nia hakotu.
Jornalista: Hortencio Sanchez
Editór: Florencio Miranda Ximenes
