DILI, 13 setembru 2024 (TATOLI) – Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Domingos Raul ‘Falur Rate Laek’, fó apresiasaun bo’ot ba povu Timor-Leste tanba hatudu maturidade hodi koopera ho autoridade seguransa no defeza hodi fó susesu ba vizita Sua Santidade Papa Francisco.
“Ida-ne’e, ita fó parabens ba sarani Timor-Leste, esforsu hotu Igreja nian, autoridade Estadu tomak, juventude, sosiadade sivil, povu tomak nia kontribuisaun. Ita komprova ba mundu, ita sivizmu, istóriku, ita hatudu ba mundu, ita orgullu ba ita aan rasik. Ida-ne’e mak ita tenke lori ba oin”, Falur Rate Laek’, dehan ba jornalista sira hafoin simu enkontru ho Diretór Universitáriu Militár Portugál, Tenente Jenerál Teodoro Maio, iha Kuartel Jenerál F-FDTL Fatuhada, sesta ne’e.
Nia dehan, vizita Papa ho nia mensajen sira timoroan hotu bele loke neon hodi moris tuir saida mak Papa koalia iha nia mensajen sira hotu bele moris iha pás no rekonsiliasaun nia laran.
”Papa nia mensajen ne’e nudar imajen ida hodi kuda hela ema hotu, Timor-Leste nian fuan. Mensajen tau hela hotu nia neon, ita halo tuir ida-ne’e para akaba buat aat, hasai buat ne’ebé aat ba buat ne’ebe di’ak ho bensa Amu Papa ninia tau nafatin iha mundu para hatudu ezemplu iha mundu pás no rekonsilasaun”, nia adianta.
Falur mós fó apresiasaun bo’ot ba autoridade seguransa ba eskuteiru ba Konsellu Polisiamentu Komunitáriu (KPK) no ba ekipa konjuntu forsa tarefa sira inklui autoridade Estadu sria no ba ema hotu ne’ebé apoia hodi fó susesu ba vizita Amu Papa iha loron tolu iha Timor-Leste, la’o iha ambiente pás no estabilidade no laiha pertubasaun.
“Parabens ba sira komisaun organizadora, komandante forsa tarefa sira, ho militár hotu ho polísia hothotu, sivil, eskuteiru sira, KPK parte seguransa ida-ne’e, ha’u hasai ha’u-nia sapeu ba sira. Tanba sira-nia onestidade no sira-nia vontade, esperitu responsablidade buat hotu bele lao di’ak”, nia kongratula.
Jornalista: Natalino Costa
Editór : Zezito Silva
