DILI, 13 setembru 2024 (TATOLI) – Ministériu Saúde sei kontinua vasina Human Papiloman Virus (HPV) atu prevene kankru serviks ba labarik feto ho idade 11-14 iha Timor-Leste, hahú iha semana oin.
“Vasina Human Papiloman Virus (HPV) ne’e atu prevene kankru serviks ba labarik feto ho idade 11-14 iha Timor-Leste, hahú iha semana oin, loron 23 setembru mak ita halo implementasaun iha teritóriu tomak”, Diretora Nasionál Saúde Materna Infantil, Madalena Fatima Sarmento Gomes informa ba TATOLI, ohin.
Nia rekorda, Governu Timor-Leste hamutuk ho parseiru sira halo lansamentu ba vasina HPV iha Palásiu Prezidensiál Aitarak-Laran Dili. Vasina ne’e direta ba labarik feto ho idade 11-14 hamutuk 10, depois iha loron 22 jullu, loron nasionál saúde ne’ebé mak Ministériu Saúde hala’o iha Munisípiu Ermera no vasina ba labarik feto hamutuk 100.
“Momentu lansamentu ita vasina uluk ba larabik feto na’in 10 iha Palásiu Prezidensiál, iha Ermera ita vasina ba labarik feto hamutuk 100 no fulan kotuk Organizasaun Mundiál Saúde mai vizita eskola 10 dezembru Comoro ita vasina ba labarik feto hamutuk 20, entaun ita-nia vasina HPV ne’ebé mak ita vasina ba labarik feto idade 11-14 hamutuk ona 130”, nia afirma.
Nia esplika, atividade vasina ne’ebé la lao durante ne’e tanba Ministériu Saúde prepara ba vizita sua santidade Papa Fransisco nian iha Timor-Leste, nune’e semana oin 23 setembru mak sei hahú fila fali vasina ida-ne’e iha territóriu timor laran tomak.
Ministériu Saúde servisu hamutuk ho Ministériu Edukasaun hodi halo vasina ba labarik hamutuk 61.374 ho idade 11-14 iha territóriu nasionál.
Jornalsita : Felicidade Ximenes
Editór : Zezito Silva
