DILI, 13 setembru 2024 (TATOLI) – Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Domingos Raul ‘Falur Rate Laek’, hateten Portugal kompromete kontinua halo kooperasaun militár ho F-FDTL iha área formasaun ba militár sira.
“Ohin ha’u simu audiénsia ida ho seniór Jenerál Teodoro Maio, nia em nome Xefe Estadu Maiór Jenerál Forsa hodi mai partisipa serimónia INTERFET ba dala-25 no nia ohin ami rua koalia uitoan sobre kooperasaun militár ne’ebé ita halo ona ho Portugal. Ita fó bem vindo ba Jenerál. ita ne’e previlezu ida, onra ida, kuandu mai ita-nia rai. Ita bo’ot sira hatene, ita ho Portugal iha istória naruk, sira lori relijiaun mai ita ohin loron, ita identifika sai haneasan identidade nasionál ida ba ita. Iha enkontru ne’e ami koalia oinsá atu kontinua kapasita rekursu umanu ba ita-nia militár sira”, Falur Rate Laek, dehan ba jornalista sira hafoin enkontru ho Diretór Universitáriu Militár Portugal, Tenente Jenerál Teodoro Maio, iha Kuartel Jenerál F-FDTL Fatuhada, sesta ne’e.
Nia dehan, área kooperasaun militár entre Timor-Leste ho Portugal, ne’e hatudu pozitivu no susesu tebes tanba durante ne’e Portugal fó oportunidade ba F-FDTL hodi ba eskola iha akademia militár iha Portugal iha área Estadu Maiór no Ofisiál Superiór nian.
“Ita hatene katak iha área rekursu umanu, formasaun militár nian, ita ho Portugal ne’e iha susesu hanesan iha formasaun ba Jenerál, ita ema na’in-rua hala’o formasaun iha ne’ebá, ida mak antigu Ministru Defeza Filomeno Paixao ne’ebé tuir formasaun jenerál iha ne’ebá no Koronél Mario Baptista ‘Bersama’ enkuantu ba formasaun Ofisiál Superiór nian ita-nia militár sira mós barak mak tuir formasaun iha akademia militár Portugal”, nia adianta.
Tenente Jenerál ne’e rekoñese ba formasaun Ofisiál Superiór barak mak falla tanba durante iha formasaun hanorin lian Portugés, entaun ita-nia difikuldade iha lingua, membru F-FDTL barak mak sei fraku iha lian portugés.
“Maibé iha formasaun Ofisiál Superiór, membru F-FDTL na’in-tolu mak susesu, akaba nia estudu iha akademia militár Portugal, sira na’in tolu ne’e mai husi forsa Navál na’in-rua, akademia militár nian”, nia afirma.
Nia dehan, maske hetan difikuldade iha lingua maibé liuhuai enkontru sira hanesan ne’e, Komandu F-FDTL kontinua esforsu buka hamtein kooperasaun ho Portugal hodi kontinua fó kapasitasaun ba militár sira.
“Sira mai hanesan ne’e, kerdizer ke ita sei kontinua atu buka reforsa tán hodi buka hatene halo balansu krítiku para depois buat sira ne’ebé ladiak ita hasai hodi hadia di’ak liután para ita lao ba oin nafatin. Kooperasaun sira ne’e ita sei reforsa ita-nian parseiru dezenvolvimentu estratéjika nian”, nia hateten.
Iha fatin hanesan, Diretór Universitáriu Militár Portugal, Tenente Jenerál Teodoro Maio, reprezenta Xefe Estadu Maiór Jenerál husi Forsa Defeza Portugal, José Nunes da Fonseca atu partisipa loron INTERFET nian ba dala-25 iha Timor-Leste.
“Ami nia enkontru ohin ne’e mós, koalia kona-ba kooperasaun entre forsa armada rua ne’e iha tempu naruk nia laran no kontinua hametin kooperasaun atu ba oin servisu di’ak liután”, nia konklui.
Jornalista: Natalino Costa
Editór : Zezito Silva
