Prezensa INTERFET iha 20 setembru 1999 fó esperansa ba ukun rasik-aan

DILI, 13 setembru 2024 (TATOLI)—Deputadu bankada CNRT, Natalino dos Santos, husu timoroan hotu iha ámbitu komemorasaun loron INTERFET ba dala-25 (20 setembru 1999- 20 setembru 2024) ne’e atu fó omenajen ba kna’ar istóriku husi forsa INTERFET, tanba sira-nia prezensa lori esperansa ba ukun rasik-aan.
Notísia Relevante: Komemora Tinan 20 Misaun INTERFET, Peter: "Ita-boot Sira Fó Inspirasaun"
“Ita bele dehan, prezensa INTERFET iha 20 setembru 1999 lori esperansa ne’ebé boot durante luta ba ukun-rasik aan, hanoin ita-boot sira sente bainhira saida mak akontese iha momentu ne’eba violénsia ne’ebé akontese iha tinan 1999 halo povu halai distruisaun boot, mate barak,” Nia hateten ba Ajénsia Tatoli iha resintu Parlamentu Nasionál (PN), sesta ne’e.

Maibé, Nia dehan iha 20 setembru INTERFET to’o fó fali esperansa moris povu nian, tamba iha intervensaun forsa internasionál nian, entaun nu’udar nasaun, Estadu no povu ida ita tenke tau konsiderasaun parte husi istória harii ita-nia Estadu.
Tanba ne’e, apresia Prezidénsia Repúblika hamutuk ho Governu hodi komemora loron importante ne’e, tamba prezensa INTERFET nian momentu ne’eba bele mai proteze no salva ita husi destribuisaun no violénsia ne’ebé akontese iha tinan 1999.
“Ba ha’u, loron ida ne’e importante 20 setembru 1999 hola parte istória Timor nian,” nia dehan
Iha ámbitu komemorasaun loron importante ne’e, Membru husi órgaun lejislativu ne’e hato’o mensajen ba sidadaun hotu-hotu nu’udar timoroan ita laiha liafuan obrigadu maibé ita agradese no hanoin nafatin memória tanba loron 20 setembru 1999 forsa INTERFET mai tun iha ita-nia rai.
“Loron ida importante, timoroan alégria, bele iha liberdade bele fila ba nia uma no knua tanba forsa INTERFET tun ita-nia rai,” Nia hato’o
Entertantu, iha loron 12 setembru liuhusi reuniaun Konsellu Ministru extraordináriu ne’ebé prezide husi Primeiru-Ministru, Kay Rala Xanana Gusmão, iha Palásiu Governu, asiste aprezentasaun ne’ebé hala’o husi Embaixadór Nelson Santos no Vicky Tchong, husi Servisu Relasaun Internasionál Prezidénsia Repúblika, kona-ba Programa komemorasaun aniversáriu INTERFET (Forsa Internasionál Timor-Leste) nian ba da-25.
Programa ne’e inklui palestra lubun ida iha loron 13 fulan-setembru, no iha loron 14 fulan-setembru komemorasaun kontinua ho desfile, jogu futsal no konsertu komunitáriu.
Iha loron 20 fulan-setembru, ne’ebé marka tinan 25 INTERFET to’o iha Timor-Leste, ne’ebé sei hala’o iha Sede Konsellu Kombatente Libertasaun Nasionál, serimónia solene no festival futsal.
Selebrasaun sira ne’e ho objetivu atu fó omenajen ba kna’ar istóriku hosi INTERFET no ba sakrifísiu sira ne’ebé halo hosi povu timoroan no hosi veteranu sira Forsa Internasionál Timor-Leste nian, nune’e promove reflesaun hamutuk kona-ba períodu antes, durante no hafoin intervensaun.
Jornalista : Nelson de Sousa
Editór : Cancio Ximenes

