Prezensa Santu Padre Papa Francisco fó vizibilidade mundiál ba Timor-Leste
DILI, 13 setembru (TATOLI)–Ministru Negósiu Estranjeiru Portugál, Paulo Rangel, konsidera vizita no prezensa pastorál no Estadu ne’ebé Santu Padre Francisco hala’o iha Timor-Leste durante loron tolu (09-11 setembru 2024) ne’e importante iha vida timoroan no fó vizibilidade mundiál.
Governante portugés relembra hanesan mós importante vizita Papa João Paulo II iha momentu ne’ebé realiza liuhusi forma serena no sorteiu ne’ebé fó vizibilidade sofrimentu povu timoroan iha altura ne’ebá ba mundu.
“Agora Papa Francisco mai hasoru nasaun foun ne’ebé nakonu ho ema foinsa’e ne’ebé defende sira-nia direitu no dignidade. Vizita Papa Francisco ne’ebé hala’o iha semana ida-ne’e hanesan momentu ida importante iha vida timoroan ne’ebé iha vizibilidade boot mundiál,” Ministru Negósiu Estranjeiru Portugal, Paulo Rangel, hato’o liahirak ne’e bainhira hala’o sorumutu ho Arsebispu Arkidioseze Metropolitana Dili, Dom Virgílio Kardeál do Carmo da Silva, iha sede episkopál Lecidere.
Ministru estranjeiru ne’e hateten, iha Portugál tuir pasu igreja katólika ba iha identidade Timor, Povu timorense iha papel importante ne’ebé Papa Francisco mai vizita husik ida-ne’e klaru.
Paulo Rangel realsa tan, enkontru ne’e mós sira kulia kona-ba papel igreja katólika iha progresu, dezenvolvimentu no kresimentu ema nia, liuliu joven liuhusi edukasaun iha parókia hotu-hotu, ne’ebé halo papel importante.
“Iha ne’e mós ita konta ita-nia rekoñesimentu ba forma ne’ebé eziste vontade divulgar no hanorin lian portugeza, maibe ida-ne’e halo haree katak eskola sira-ne’e iha kultura no formasaun barak ba foinsa’e no labarik sira, presiza rekursu hanesan profesór ba lian portugeza,” nia hateten.
Tuir nia, rekursu iha área ne’e seidauk sufisiente tanba ne’e mak presiza traballu sira-ne’e, kualifika no hanorin timoroan sira atu hadi’a moris ida di’ak-liu iha futuru.
Tanba ne’e mak ministru ne’e dehan presiza kolaborasaun husi parte oioin no área ida-ne’ebé presiza rekursu, iha ne’e mós nia hato’o agradesimentu ba oportunidade no jestu akollimentu husi povu.
Iha fatin hanesan, Arsebispu Arkidioseze Metropolitana Dili, Dom Virgílio Kardeal do Carmo da Silva, hateten enkontru ho Ministru Negósiu Esranjeiru Portugal ne’e atu ko’alia kona-ba asuntu edukasaun, tanba igreja mós iha eskola balun hodi eduka timoroan sira.
“Ami ko’alia kona-ba aspetu edukasaun iha enkontru ida-ne’e. Entaun, ha’u halo proposta ida oinsá bele hato’o ba iha Ministériu Edukasaun (portugés ba área lian portugeza), tanba iha eskola balun ne’ebé responsabiliza husi igreja iha Timor-Leste,” Arsebispu Arkidioseze Metropolitana Dili, Dom Virgílio Kardeal do Carmo da Silva.
Jornalista : Jesuína Xavier
Editór : Cancio Ximenes
