ROMA, 13 setembru 2024 (TATOLI) – Papa Francisco to’o hikas Roma ho seguru hafoin viajen loron 12 ba ASEAN no Oseánia, kobre nasaun haat inklui Indonézia, Papua Nova Guiné (PNG), Timor-Leste no Singapura. Papa Francisco to’o hikas Aeroportu Internasionál Roma, tuku 6.45 lorokraik, oras lokál.
Durante viajen ba ASEAN no Oseánia, Santu Padre enkoraja líder sira atu foti asaun sériu hasoru mudansa klimátika, haburas diálogu inter-relijioza, halakon deziguladade rikeza, habelar dame, asegura distribuisaun asisténsia sosiál justu ba ema hotu, no hametin prezensa Igreja Katólika iha rejiaun Sudeste Asiátiku no Pasífiku.
Hafoin viajen loron 12, iha Konferénsia Papa Nian iha Aviaun Singapore Airway, Santu Padre deskreve ninia reasaun ba nasaun haat ne’ebé mak nia vizita: Satisfeitu ho Indonézia, Impresionadu ho PNG, Surpreza ho Singapura no Apaixonadu ho Timor-Leste.
Indonezia: “Satisfeitu”
Durante Santu Padre ninia vizita iha Indonézia, Papa Francisco hasoru malu ho líder politíka no relijioza Indonézia, inklui Prezidente Repúblika, Joko Widodo, no Grande Imam, Nasaruddin Umar, hodi diskuti kona-ba hametin relasaun bilaterál entre Vatikanu ho Indonézia no mós hametin fraternidade entre fiar na’in Katóliku no Musulmanu liuhusi diálogu inter-relijoza. Diálogu Inter-relijioza refleta tema Vizita Papa Francisco nian ba Indonézia – Fé, Fraternidade no Kompaisaun.
Eintermu kooperasaun bilaterál entre nasaun rua, Vatikanu no Indonézia kompromete hametin kooperasaun hodi husu ba mundu buka solusaun ba konflitu Palestina no Ukraina hodi restaura hikas pás no estabilidade iha nasaun rua ne’e.
Santu Padre rekoñese katak Indonézia nu’udar nasaun riku ho diversidade kultura, rasa, lian no relijiaun. Tanba ne’e, nia husu atu nasaun líder polítiku Indonézia respeita direitu umanu no direitu polítiku sidadaun hotu nian.
Sua Santidade mós enkoraja Indonézia atu haburas unidade nasionál ne’ebé nakonu ho toleránsia no respeita malu.
Papua Nova Guiné: “Impresionadu”
Durante Santu Padre ninia vizita loron tolu iha Papua, nia hasoru Governadór General Bob Dadae, no Primeiru Ministru, James Marape, hodi diskuti kona-ba oinsá mak asegura distribuisaun rikeza naturál hanesan no justu iha Papua. Amu Papa dehan Papua riku ho rikeza naturál oioin, maibé povu seidauk sente benefísiu.
Papa énfaze katak rikeza naturál PNG nian la’ós de’it atu benefisia kompañia estranjeiru, tanba ne’e husu Governu PNG atu konsolida instituisaun públika no kria polítika di’ak hodi asegura sidadaun hotu hetan benefísiu husi rikeza naturál ne’ebé mak iha.
Santu Padre mós husu atu Governu PNG foti intervensaun sériu hodi hakotu konflitu entre tribu iha PNG, ne’ebé rezulta komunidade barak lakon vida.
Papa Francisco mós husu sarani Katóliku PNG atu labele fiar matan-dook no buan. Kazu deskonfia malu buan iha PNG rezulta ona ema barak mak lakon vida.
Tuir estimasaun UN nian, ema 200-resin mak lakon vida tanba deskonfia malu ho buan. Nune’e mós ema 50,000 mak husik hela sira-nia uma kada tinan tanba hetan deskonfia husi vizinu no bele hetan oho.
Timor-Leste: “Apaixonadu”
Durante vizita loron tolu iha Timor-Leste, Santu Padre hasoru Prezidente Repúblika, José Ramos, no líder relijiozu inklui, Kardeál Virgilio do Carmo da Silva, no bispu sira. Papa mós hasoru foinsa’e no labarik ho difisiente sira.
Durante ninia prezensa iha Timor-Leste, Santu Padre toka kona-ba importánsia husi Dokumentu “Fraternidade Umana kona-ba Pás Mundiál no Konvivénsia Komun” ne’ebé mak Papa rasik asina ho Grande Imam Al-Azhar, Ahmad Al-Tayyeb.
Bainhira Papa hasoru labarik difisiente iha Orfonatu Madre ALMA, Santu Padre ko’alia kona-ba importánsia husi fó tulun no kuidadu ema seluk no mós loke aan ba ema seluk nia tulun no kuidadu.
Durante enkontru ho líder relijioza sira, Santu Padre husu atu sira kontinua haklaken no hamorin liután Nai Maromak nia evanjellu iha Timor-Leste.
Papa mós husu Timor-Leste atu hakotu aktu violente entre grupu arte marsiál no rituál entre foinsa’e Timoroan.
Iha Dili, Santu Papa kontente ho Prezensa foinsa’e no labarik Timoroan sira-nian no hateten, “Ha’u sei lahaluha hamnasa furak ne’ebé imi hatudu mai ha’u”.
Iha Misa Solene Tasi-tolu, Papa Francisco husu sarani hotu atu labele monu ba babeur husi ‘Lafaek Estranjeiru’ ne’ebé tama daudaun ona iha Timor-Leste. Santu Padre fó alerta katak ‘Lafaek Estranjeiru’ bele estraga armonia no kultura Timor-Leste.
Singapura: “Surpreza”
Iha Singapura, Santu Padre hasoru líder polítiku, inklui Prezidente Repúblika Singapura, Tharman Shanmugaratnam, no Primeiru Ministru, Lawrence Wong hodi ko’alia kona-ba hametin relasaun bilaterál entre nasaun rua.
Santu Padre mós hasoru malu ho líder relijioza, inklui Kardeál William Seng Chye Goh, Arsebispu Singapura, no bispu sira hodi koalia kona-ba oinsá mak bele hametin prezensa Igreja Katólika iha Singapura no rejiaun Sudeste Asíatiku.
Maske surpreza ho uma andar oioin, Papa Francisco husu Estadu Singapura atu tau matan ba idozu, ki’ak no traballadór imigrante ne’ebé konsidera nu’udar grupu vulneravel iha nasaun ne’e.
Papa mos surpreza ho Singapura ninia ambiente ne’ebé moos, saudável, no fraternidade entre sidadaun sira.
Jornalista: Filomeno Martins
Editór: Rafael Ximenes Belo
