BAUCAU, 16 setembru 2024 (TATOLI) – Anin ho intensidade boot estraga uma komunidade hamutuk 50-resin iha Baucau.
Komandante operasaun Autoridade Protesaun Sivíl (APC, sigla Portugés), Francisco Viana, esplika, anin-boot ne’e akontese iha semana kotuk nune’e APC konsege identifika uma komunidade ne’ebé hetan estragu hodi fo apoia emerjénsia dahuluk ba vítima sira iha postu administrativu Venilale no Baucau Vila.
“Anin-boot sobu uma balun estragus totál, iha aat natoon no balun kmaan, informasaun tama ona hamutuk 50-resin, maibé dadus seidauk kompletu,” Komandante Operasaun Protesaun Sivíl Munisipiu Baucau hateten iha Vila Antiga, segunda ne’e.
Apoia emerjénsia ne’ebé fó ba vítima sira provizóriu sei aloka ba vítima uma-kain 14 hanesan iha postu administrativu Venilale hamutuk 13 no Baukau Vila ida, enkuantu iha postu Baguia, Laga, Kelikai no Vemasse sei ba apoia iha tempu besik tanba simu informasaun tarde.
Viana husu autoridade suku no aldeia atu informa situasaun bainhira komunidade sira hetan dezastre naturál ba APC hanesan relata dadus nune’e parte kompotente bele apoia emerjensia ba vítima sira.
“Ha’u husu xefe suku sira, akontese karik labele hein, haruka kedas vítima sira-nia dadus,” Viana akresenta.
Dadus presiza relata bainhira mosu dezastre naturál hanesan fotografia estragus nian, kartaun eleitorál, fixa família nune’e parte kompotente bele prosesa hodi relata ba nasionál no distribui apoia emerjénsia.
Autoridade Postu Venilale hamutuk ho Protesaun Sivíl Munisipál rejistu uma-kain hamutuk 13 ne’ebé kategória tipu estragus natoon no kmaan ne’ebé verifika no relata ona ba nasionál hodi fo apoiu materiál rekuperasaun.
Husi uma-kain 13 ne’ebé hetan estragus iha Venilale rejista husi suku Uai-Laha, Fatulia, Bahamori no Uatu-Haco.
Enkuantu iha postu administrativu haat seluk sei iha prosesu identifikasaun no sei kontinua distribusi apoia emerjénsia iha tempu besik.
Jornalista : Natalino Belo
Editór : Evaristo Soares Martins
