Asidente iha Lautem na’in-neen tratamentu iha HNGV

DILI, 16 setembru 2024 (TATOLI) – Xefe Departamentu Emerjénsia iha Hospitál Nasionál Guidu Valadares (HNGV), Julia Quintão, hateten asidente ne’ebé akontese iha Com-Lautem, na’in-neen mak halo tratamentu iha ospitál.

“Tranferénsia mai ospitál, ida ne’ebé mak grave liu ne’e iha mane ida ho idade 15, tanba hetan pankada makas iha  ulun, entaun bainhira transporta mai iha ne’e, lakon konsiente  no agora  daudaun baixa iha ICU”, nia esplika.

Julia haktuir, vítima sira ne’ebé mak halo transferénsia mai HNGV hamutuk na’in-neen, husi ne’e labarik kiik na’in-rua no iha na’in haat mak ema boot.

Nia hateten, husi sira na’in-lima ne’e hetan tohar iha parte los no daudaun ne’e halo hela tratamentu iha sala sirurjia.

“Sira nia kondisaun sadar hotu maibé sira-nia ain parte los mak tohar, entaun agora daudaun médiku sira halo hela atendimentu ba sira”, nia dehan.

Xefe Departamentu Emerjénsia haktuir katak horseik lokraik mak kareta ida baku fila iha Com Lautem, rezulta ema na’in-tolu mate no na’in-neen mak kanek grave.

“Asidente ne’ebé mak akontese iha Com Lautem, tuir informasaun katak kareta baku fila iha tuku 15 lokraik, asidente ne’e ema hamutuk 16, husi ne’e iha na’in-tolu mate fatin, na’in-neen mak daudaun baixa iha HNGV no iha na’in-hitu mak kondisaun di’ak ne’ebé halo observasaun iha sentru saúde lospalos no Opsitál Rejionál Baucau”, Julia haktuir tan iha nia kna’ar fatin HNGV, ohin.

Jornalista : Felicidade Ximenes

Editór : Zezito Silva