DILI, 16 setembru2024 (TATOLI)–Xefe Departamentu Servisu Água no Saneamentu iha Autoridade Munisipiu Dili (AMD), Domingos dos Santos Soriano, hateten durante loron tolu (09-11 setembru) Papa Francisco vizita Timor-Leste, ekipa saneamentu labele rekolla lixu entaun komunidade soe lixu arbiru no to’o agora lixu sira-ne’e rekolla la hotu.
Nia hateten, lixu ne’ebé komunidade soe durante loron tolu mak barak liu, tanba ne’e mak servisu sanementu seidauk rekolla hotu hodi ba soe iha lixeira Tibar nian.
“Iha loron tolu ne’e, ami bandu katak empreza sira la raut lixu no populasaun hasai no soe lixu arbiru. Bainhira Amu Papa liu mak bele rekolla lixu iha 12 setembru, entaun agora ami raut la hotu-hotu de’it,” Xefe Departamentu Servisu Água no Saneamentu iha Autoridade munisipiu Dili (AMD), Domingos dos Santos Soriano, hateten ba Agência Tatoli, iha Caicoli, segunda ne’e.
Iha bairru balun, nia dehan, sira konsege raut hotu no balun ne’ebé seidauk raut hotu tanba kuantidade lixu ne’ebé komunidade soe barak liu.
Tuir nia, komunidade soe lixu iha kapitál kontinua naklekar ba iha estrada, tanba populasaun balun la soe iha lixu fatin maske fatin lixu ne’e mamuk.
“Losduni, iha loron sira ikus ne’e iha lixu balun soe hela iha lixeiru sorin, tanba lixu barak no lixeiru nakonu. Dalabarak populasaun mós seidauk iha konsiénsia di’ak. Maibé daudaun ne’e populasaun soe lixu di’ak uitoan ba iha fatin lixu,” nia dehan.
Xefe departamentu ne’e sujere ba populasaun atu utiliza lixeiru sira-ne’ebé tau ona iha fatin sira apropriadu atu nune’e lixu sira labele naklekar sai.
Domingos dos Santos Soriano garante servisu saneamentu sei esforsu hamutuk ho empreza sira atu bele raut lixu iha tempu badak.
Jornalista : Jesuína Xavier
Editór : Cancio Ximenes
