Garante orden públika, ONG HABADA apresia servisu PNTL no F-FDTL
DILI, 16 setembru 2024 (TATOLI) – Organizasaun Naun-Governamentál Hali ba Dame (HABADA) apresia no hato’o rekoñesimentu kle’an ba Forsa Tarefa kompostu hosi Polísia Nasionál Timor-Leste (PNTL) no Falintil-Forsa Defeza Timor-Leste (F-FDTL) ba servisu ezemplár, durante vizita istórika Sua Santidade Papa Francisco iha Dili, Timor-Leste, husi loron 9-11 setembru tinan-2024 ne’e.
Tuir HABADA, iha komunikadu imprensa ida ba redasaun TATOLI ohin, deskreve, vizita Santu Padre, nu’udar eventu ne’ebé atria fiél no vizitante rihun ba nasaun, hala’o ho orden no seguransa ne’ebé boot tebes, hodi refleta dedikasaun, profisionalizmu no koordenasaun implekável forsa seguransa nian. Planeamentu estratéjiku no esforsu hamutuk ente PNTL no F-FDTL garante katak vizita ne’e hala’o la ho insidente, hodi permite populasaun selebra momentu importante ne’e ho neon hakmatek.
“Ami rekoñese dezafiu lojístiku no operasionál atu jere ema-lubun ida ho magnitude hanesan ne’e, nune’e mós nesesidade atu proteje la’ós de’it Papa Francisco, maibé mós sidadaun no peregrinu rihun ba rihun ne’ebé partisipa iha eventu ne’e,” komunikadu ne’e sita.
“Prezensa vijilante no respeitu husi forsa seguransa sira kontribui ba susesu eventu ne’e no manutensaun ba pás no orden públika,” dokumentu ne’e énfaze.
ONG HABADA mós agradese Governu Timor-Leste, PNTL, F-FDTL no ema hotu ne’ebé envolve iha preperasaun no ezekusaun medida seguransa nian. “Esforsu konjuntu ne’e hanesan ezemplu klaru kona-ba oinsá kooperasaun bele garante susesu ba eventu sira ho eskala boot, hodi reforsa konfiansa populasaun nian ba instituisaun nasionál sira,” sosiedade sívil ne’e rekoñese.
“Papa Francisco nia vizita la’ós de’it hametin lasu espirituál no kulturál sira iha Timor-Leste, maibé mós hatudu nasaun ne’e nia kapasidade atu sai uma-na’in ba eventu internasionál sira ho efisiente no Segura,” ONG ne’e konklui.
TATOLI
