DILI, 16 setembru 2024 (TATOLI) –Jornalista Timoroan na’in to’o hikas Timor-Leste hafoin akompaña viajen Amu Papa hale’u nasaun haat iha ASEAN no Oseania, inklui Indonézia, Papua Nova Guiné (PNG), Timor-Leste no Singapura.
Jornalista na’in ne’e mak Virginia dos Santos Silva husi RTTL, E.P, Delfim de Oliveira husi GMN, no Filomeno Martins husi Agência Noticiosa de Timor-Leste, I.P (TATOLI, I.P).
Jornalista na’in tolu semo ho Citilink to’o iha Aeroporto Internasionál Prezidente Nicolau Lobato mais ou menus tuku 12.30 meiu-dia hafoin viajen besik oras rua husi Bali.
Halo kobertura ba viajen Amu Papa nu’udar oportunidade di’ak ba Jornalista Timoroan hodi hasa’e sira-nia kapasidade no abilidade jornalizmu iha kobertura eventu internasionál boot.
“Ba ami kontente tebtebes tanba primeiravez mak jornalista husi Timor-Leste bele hola parte iha viajen Amu Papa nian. Ida-ne’e esperiénsia boot ida ba ami tanba ami bele kampaña viajen Santu Padre nian hamutuk ho jornalista rai seluk. Tanba iha jornalista balun mak akompaña viajen Santu Padre nian dezde St. João Paulo II,” Jornalista Delfim de Oliveira husi GMN dehan, iha Aeroportu Internasionál Prezidente Nicolau Lobato, Dili, segunda ne’e.
Jornalista Filomeno Martins husi Agência Noticiosa de Timor-Leste, I.P (TATOLI, I.P) mos hateten halo kobertura ba Viajen Santu Padre nian mak esperiensia osan mean ne’ebé sei la repete tan iha tempu tuirmai.
“Halo kobertura hamutuk ho jornalista husi media internasionál oioin, ida-ne’e biban kmanek ida ba ha’u atu haree ha’u-nia frakeza, hodi esforsu hodi hasa’e ha’u-nia koñesimentu no abilidade jornalizmu ba kobertura eventu boot sira,” Filomeno dehan.
Enkuantu Jornalista Virginia dos Santos Silva husi RTTL, E.P, hato’o katak iha oportunidade ne’e, nia senti orgullu tanba bele hasoru direta ho Santu Padre no lori Timor-Leste nia naran hodi aprezenta prezente ba Amu Papa.
Hafoin to’o Dili ho seguru, jornalista na’in tolu espresa agradesimentu kle’an ba apoiu tomak husi Governu Timor-Leste, Igreza no Ekipa Sekretariadu Vizita Amu Papa.
“Ami agradese ba IX Governu Konstitusionál, nomos mos ba Igreza, ba konfiansa ne’ebé mak fó mai ami hodi akompaña viajen Amu Papa,” Delfim tenik.
Virgina mós hato’o agradese ua’in ba Govenu no Igreja Timor-Leste tanba bele fó oportunidade furak ida-ne’e ba jornalista Timoroan, liuliu feto hodi akompaña viajen Santu Padre.
Jornalista Filomeno mós hato’o agradese uain ba Governu, Igreza no Insituisaun TATOLI, I.P ba fiar tomak ne’ebé mak fó ba nia hodi hola parte iha viajen Santu Padre haleu nasaun haat.
“Ha’u hakarak hato’o obrigadu ua’in ba apoiu tomak husi Governu no Igreja Timor-Leste, liuliu ba Prezidénsia Konsellu Ministru, Ministériu Administrasaun Estatál, Ministériu Negósiu Estranjeiru no Kooperasaun, no Sekretáriu Estadu Komunikasaun Sosiál. Ha’u mós hakarak hato’o obrigadu ua’in ba apoiu tomak husi Sekretariadu Vizita Amu Papa no TATOLI, I.P tanba ho sira-nia apoiu tomak ha’u bele akompaña viajen Santu Padre nian to’o hotu,” Filomeno agradese.
Jornalista na’in tolu arranka husi Timor-Leste ba Vaticano iha 28 agostu 2024, no akompaña Viajen Santu Padre nian husi loron 2 to’o 13 setembru 2024.
TATOLI
