VIQUEQUE, 16 setembru 2024 (TATOLI)- Ministériu Agrikultura, Peska, Pekuária no Floresta (MAPPF) liuhusi Diresaun Veterenária hahú halo reabilitasaun no espasaun edifísiu Sentru Saúde animál, iha aldeia Mauselok, suku Matahoi, Postu Administrativu Uatulari, Munisípiu Viqueque.
“Klínika Saúde Animál ba kada postu nian agora dadaun ne’e postu Uatulari maka hahú halo konstrusaun reabilita. Depois kontrusaun klínika ida-ne’e konstrusaun ramata sei kompleta rekursu hotu-hotu hodi fó atendimentu ba komunidade sira-ne’ebé nia animál moras”, Diretór Servisu Agrikultura Munisípiu Viqueque (SMAP),Olivio Soares Freitas, ba Agência Tatoli, iha postu Viqueque Vila, ohin.
Kona-ba Klínika saúde animál, Olivio dehan, konstrusaun klínika saúde animál ba munisípiu Viqueque foin hahú konstrusaun, nune’e ba oin sei konstrui mós kada postu ida-idak hanesan postu Ossu, Uatucarbau, Lacluta no Viqueque hodi fó atendimentu ba komunidade sira-ne’ebé presiza.
“Tanba durante ne’e ita laiha klínika ruma iha postu nune’e ita-nia funsonáriu saúde animál ne’ebé ita koloka iha kada postu ne’e sira hela iha ida-idak nian uma mak ba fó antendimentu ba ita-nia komunidade sira-nia animál sira-ne’ebé moras”, nia akresenta.
Nia relata, makse empreza Dariwin Unip Lda mak sai manán ba projetu kontrusaun ba reabiltasaun klínika kle’ur, maibé agora maka foin hahú konstrusaun ne’ebé ho durasaun fulan tolu.
“Ha’u hanoin kontrusan ba klínika finaliza sei fasilita ita-nia funsionáriu sira hodi servisu iha laran no hafasil ba komunidade Uatulari hodi halo konsulta sira-nia animál”, nia akresneta.
Entretantu, ba reabilitasaun no espasaun edifísiu Sentru Saúde animál gasta orsamentu hamutuk $34,985.00.
Tuir dadús servisu saúde animál ne’ebé servisu iha postu administrativu Uatulari hamutuk na’in-1 ne’ebé durante ne’e fó atendementu ba komunidade postu Uatulari.
Jornalista : Vitorino Lopes da Costa
Editór : Florencio Miranda Ximenes
