DILI, 16 setembru 2024 (TATOLI)–Koordenadór Mídia ba Komite Nasionál Organizasaun ba APF, Inocencio Xavier, hateten ema na’in-600 husi nasaun 11 mak sei partisipa iha Asia People Forum (APF) ho tema “Toward a people-led democracy and sobereigngnty in southeast Asia”, ne’ebé sei hala’o iha kinta 18 setembru to’o sábadu 21 setembru 2024 iha Dili.
APF hanesan konferénsia anuál ne’ebé organiza husi sosiedade sivil husi Asosiasaun Nasaun Sudeste Aziatiku (ASEAN) atu reforsa hamutuk asaun solidariedade ba defeza desizaun sidadaun nian.
Partisipante sira ne’e ema 200 mak sei mai husi rai-li’ur no restantante ne’e sei partisipa husi sidadaun timoroan sira husi organizasaun no entidade oioin, no partisipante sira-ne’e mai husi ema entidade oioin hanesan sosiedade sivil, ema ho defisiénsia, universitáriu no kamponezes ne’ebé envolve iha konferénsia ne’e.
“Eventu ne’e sei akontese iha eskola STM Becora ne’ebé sei envolve husi nasaun 11 inklui Timor-Leste. Partisipante sira hamutuk ema na’in-600,” Koordenadór mídia ba Komite Nasionál organizasaun ba APF, Inocencio Xavier, hateten ba jornalista sira, liuhusi media breafing, iha Caicoli.
Koordenadór ne’e hateten, nasaun sira-ne’e mak hanesan Brunei Darusalam, Cambodia, Indonézia, Laos, Mianmar, Malázia, Filipina, Singapura, Tailandia, Vietname inklui Timor-Leste.
Inocencio Xavier dehan, iha konferénsia APF ne’e sei aborda temátiku sira hanesan emansipasaun feto, LGTBI, mudansa klimátika no direitu umanu.
Iha konferénsia ne’e mós sei hatudu ezibisaun kona-ba produsaun video ka rezultadu publikasaun ruma kona-ba serbisu sira organizasaun sira.
Responsável ne’e dehan, agora APF ne’e sei organiza husi Timor-Leste, tanba ne’e mak sosiedade sivil sei prepara hela no fó daudaun media breafing no voluntáriu sira husi organizasaun naun governamentál (ONG) no rede juventude ba eventu konferénsia APF nian.
“Media breafing ne’e atu reforsa fahe informasaun ba públiku, tanba ita labele akumula ema hotu atu partisipa iha eventu ne’e. Atu fó sai informasaun kona-ba papel sosiedade sivil nian no sidadaun sira-nia entendimentu kona-ba adezaun Timor nian ba ASEAN,” nia dehan.
Ne’eduni, nia dehan, timoroan rasik organiza eventu ida-ne’e ba hodi bele hatene saida mak ASEAN nia prezensa.
Jornalista : Jesuína Xavier
Editór : Cancio Ximenes
