DILI, 16 setembru 2024 (TATOLI)—Xefe bankada PLP, Maria Angelina Sarmento, rekomenda ba Xefe Estadu, José Ramos Horta, atu promove diálogu no rekonsiliasaun entre kamada oioin iha sosiedade Timorense hodi garante unidade nasionál iha luta kontra inimígu foun sira hanesan mukit, insustentabilidade fiskál no sira seluk ne’ebé nasaun ne’e hasoru.
Iha ámbitu abertura sesaun lejislativa daruak iha lejislatura daneen iha Parlamentu Nasionál, ohin PLP hakarak rekomenda pontu balun hanesan; dahuluk, órgaun soberanu sira defende nafatin interrese konstitusionál atu lori moris di’ak povu Timor-Leste liuhusi seriedade iha luta kontra pobreza iha ninia dimensaun oioin, nudar ajenda prinsipal etapa tinan 25 tuir-mai.
“Daruak, rekomenda Prezidente Repúblika promove diálogu no rekonsiliasaun entre kamada oioin iha sosiedade Timorense hodi garante unidade nasionál iha luta kontra “inimigu” foun sira hanesan pobreza, obskurantizmu, insustentabilidade fiskál, jogu jeo-polítika globál no rejionál ne’ebé la-favorável ba rai ki’ik hanesan Timor-Leste,” Nia hato’o iha intervensaun polítika iha uma fukun PN, segunda ne’e.
Datoluk, PN bele proativu liután hodi halo projetu-lei oioin ne’ebé nesesáriu hodi lori moris-diák ba povu no dezempeña ninia funsaun nu’udar fiskalizadór loloos ba aktu Governu inklui fiskalizasaun ba ezekusaun orsamentu relasiona ho vizita Sua Santidade Papa nian, hodi garante demokrásia ida-ne’ebé vibrante iha Timor-Leste.
Dahaat, rekomenda Governu adota no kria kondisaun oioin ne’ebé nesesáriu hodi respeita dignidade no direitu umanu Timorense, promove atuasaun sira-ne’ebé bazeia ba abordajen direitu umanu nian no dezenvolve programa oioin ne’ebé hatuur povu Timor-Leste nu’udar sentru ba dezenvolvimentu.
Dalima, rekomnda mós Governu investe iha labarik no joven sira, nu’udar jerasaun kontinuadór ka erdeiru istória lutadór Timor-Leste nian hodi reativa fali bolsa da mãe Nova Geração no bolsa estudu oioin hodi eleva sira-nia abilidade no kapasidade hodi sai kriativu no produtivu liután iha perkursu dezenvolvimentu nasionál Timor-Leste.
Daneen, rekomenda Governu Timor-Leste adota no introdús dokumentu seluk husi Papa Francisco hanesan Fratelli Turri no Laudato Si, hamutuk ho Fraternidade Umana iha instituisaun edukasaun oioin, hodi nune’e promove valór koezisténsia iha pás, toleránsia, respeitu ba dignidade umana, moris iha moderasaun ka simplisidade, no prezervasaun rasa umana no sustentabilidade husi planeta rai-ne’e.
“Mai ita kombate injustisa, pobreza, tiránia no degradasaun ambientál. Hamutuk, mai ita haburas “kultura” moris hamutuk iha domin no dame, tane malu nu’udar maun-alin, respeita malu, sai solidáriu nafatin ba malu, tuir naroman fé nian,” nia dehan.
Xefe Bankada FRETILIN, Aniceto Longuinhos Guterres Lopes, fó hanoin iha lejislatura dalima PN aprova ho unanimidade rezolusaun ne’ebé adota dokumentu sobre Fraternidade Umana asina husi Papa Fransisco ho Imam boot Al-Tayyeb, atu nune’e, prinsipiu fraternidade umana mak konsagra ona iha dokumentu ne’e, sai referénsia no baze orientasaun iha vida sosiedade no vida Estadu ida-ne’e.
“Adosaun dokumentu fraternidade umana nu’udar pasu pozitivu ida-ne’ebé PN foti iha momentu ne’eba, tanba konstrusaun Estadu RDTL ne’e sentraliza iha povu, iha ema, tanba povu mak Estadu nia hun no riku soin ne’ebé boot liu hotu. Ne’eduni mak governasaun ne’ebé di’ak bainhira governante sira hatene respeita povu ne’ebe fó fiar ba nia atu ukun ho hahalok ne’ebé refleta duni espiritu fraternidade umana,” nia dehan.
Vizita Santu Padre nian mai Timor-Leste, fanu timoroan hotu atu tau iha néon no laran, nesessidade atu afirma no interioriza prinsípiu fraternidade umana iha ida-idak ninia aan no iha povu nia leet, em partikulár ba polítiku sira, reprezentante povu sira, ukun-na’in sira no líder nasaun tomak, atu óinsa tradús prinsípiu fraternidade umana ba iha polítika ka asaun governativa ba iha desizaun sira-ne’ebe orgaun kompetente sira foti.
Iha parte seluk, nia dehan, tinan 20-resin ona, timoroan halo esforsu oioin hodi halakon asimetria sosiál, ekonómika no polítika sira-ne’ebé herda husi pasadu no husi Timor-Leste nia frakeza rasik, timoroan hotu haree no testemuña rasik mudansa balun en-termu kualidade no kuantidade.
Alterasaun klimatika afeta ba vida kampones no produtu agríkola, produtu alimentár, ameasa ezisténsia biodiversidade ne’ebé ko-existe hodi mantein ekilíbru sitema ekolójiku, ninia impaktu afeta mós ba seguransa alimentár iha Timor-Leste, matéria ba nesesidade bázika hanesan foos no ai-han seluk folin sa’e ho tendénsia sa’e ba bebe’ik, tanba kuaze sasán hotu importa husi rai-li’ur.
Problema edukasaun no problema sistema saúde ne’ebé atu oferese serbisu saúde ho kualidade ba sidadaun sira.
Ba presípisiu fiskál, duke medida ekonómika estratéjika hodi diversifika ekonomia no dezenvolve rekursu naturál potensiál sira seluk nu’udar alternativa.
Iha sorin seluk, avansu iha siénsia no teknolójia dijitál konfronta intelijénsia umana hasoru ne’ebé marka istória foun iha sosiedade umana.
“Ne’e mak dezáfiu balun ne’ebe destaka iha biban ida-ne’e husi dezafiu lubun ne’ebé mak Timor-Leste hasoru, ho konsiénsia katak governasaun demokrátika permite inkluzaun no ko-ezisténsia entre forsa politika governativa no opozisaun demokratika konstrutiva iha kontestu asuntu sira estruturante ba Estadu no interese nasionál. Ho abertura, ba atu diálogu no diskusaun franku hodi buka dalan ne’ebé di’ak-liu ba Timor-Leste nia vida,” nia hateten.
Parlamentu Nasional mak nu’udar sentru ba debate, ba kontestasaun rasionál no halo konsertasaun polítika liuhusi diálogu, argumentasaun jurídika, polítika no sosiál ekonomika ba interrese nasionál.
“Ita hotu defende nafatin demokrasia, partidu ne’ebé mak hetan konfiansa husi povu mak ukun. Inkluzuan la signifika partidu hotu-hotu tenke tama iha Governu, maibé tenke iha kompromisu nasionál ida atu salva Timor-Leste, ho polítika nasional foun atu kontribui ba progresu no hasai povu husi mukit,” nia dehan.
Jornalista : Nelson de Sousa
Editór : Cancio Ximenes
