DILI, 16 setembru 2024 (TATOLI)—Prezidente Parlamentu Nasionál (PPN), Maria Fernanda Lay, husu Deputadu/a sira atu kontinua serbisu ho dedikasaun no domin liután tuir mandatu konstituisionál ne’ebé iha hodi serbi oinsá foku ba moris di’ak povu nian.
“Deputadu/a inspirasaun ba serbisu ne’ebé sei hasoru ba oin mantein foku ho determinasaun, dezáfiu sira-ne’ebé ita enfrenta ezije asaun rápida no pasu seguru,” Nia hato’o iha ninia diskursu iha serimónia abertura sesaun solene lejislativa daruak iha lejislatura daneen iha uma fukun Parlamentu Nasionál (PN), segunda ne’e.
PN iha papél importante hodi trata no kontribui forma signifikante ba dezenvolvimentu Timor-Leste, nune’e fundamentál mantein kooperasaun produtiva ho órgaun soberania sira seluk, tanba povu ne’e merese hetan asaun konkretu la’ós ho retórika polítika.
Nune’e, nia dehan, ezije rapidez no profisionalizmu, la’ós ho fraze feita, apenas hodi serve interrese pesoál no desnesesáriu.
“Liuhusi kolaborasaun jenuína ho órgaun sobernia sira seluk hodi bele alkansa rezultadu serbi ita-nia populasaun,” nia hateten.
Tan ne’e, fó hanoin hikas hanesan Deputadu prezente iha ne’e serbi povu ne’ebé depozita sira-nia konfiansa ba promesa ne’ebé hato’o nu’udar kompromisu presiza onra.
Tinan oin, aprezenta dezáfiu signifikante ba ita-nia adezaun ba Organizasaun Mundiál Komérsiu (OMK) no pasu iha diresaun integrasaun iha ASEAN nu’udar marku estruturante ba futuru nasaun nian.
“Ita-nia papél atu hala’o ho responsabilidade no vizaun ba tempu naruk, evita obstákulu deznesesáriu ba kumprimentu kompromisu ne’ebé asume ona husi ezekutivu, ba konstrusaun futuru ita-nia nasaun,” nia dehan.
Maibé mós, reforma sistema justisa no finansa públika ezije másimu empeñu kada ema ida, mundansa ne’e fundamentál hodi konstrui Timor-Leste ida mais justu, prósperu no efisiente.
Dalan ba oin mak nobre no nesesáriu serbisu unidu, transcendendo diferensa partidária, foku ba iha beim komún, kada loron iha Parlamentu ida-ne’e hanesan oportunidade onra konfiansa povu, no demostra espíritu uniaun ho vizita sira-ne’ebé mai nasaun Timor-Leste durante iha ultima semana bele dura ba serbisu diáriu.
Nune’e, PPN reafirma ninia kompromisu no konvoka kada deputadi/a ida ho lian dedika ba interrese reál ba nasaun, hamutuk no hatudu prova tiha ona mak bele realiza grande feita, kontinua apoiu, pois konstrui Timor-Leste ne’ebé povu merese no mehi.
“Ba ikus liu, liafuan sabedória no kompaisaun Santu Padre, motiva ita serbisu ho dedikasaun no domin liután. Ita-nia mensajen guia ita-nia asaun no desizaun iha tinan ne’ebé inísia,” nia hateten.
Lejislatura dahuluk, PN prodús lei 12
Entretantu, Deputada bankada CNRT, Cedelizia Faria dos Santos, hateten ohin Parlamentu Nasionál hakat ona ba tinan-ida, no hahú sesaun lejislativa ba daruak nian.
Nu’udar lejisladór, bancada CNRT rejista iha lejislativa-ida liubá, PN prodús lei hamutuk 12, produtu lei hirak ne’e hakbiit ona serbisu ezekutivu nian hodi halo jestaun no administrasaun públika no konsege dudu funsionamentu instituisaun Estadu sira tuir lei haruka.
Papél Deputadu importante tebes atu asegura no sustenta serbisu Governu ida-ne’e hodi halo ezekusaun programa tuir kompromisu no programa Governu Konstitusionál da-sia (IX) nian ba períodu tinan lima.
Nia dehan, iha tinan ida liubá, Parlamentu Nasionál halo ona apresiasaun ba programa Governu Konstitusionál da-sia (IX), hafoin ne’e halo alterasaun no aprovasaun ba Lei Orsamentu Retifikativu tinan 2023, alterasaun Lei Enkuadramentu Orsamentu Jerál Estadu no Jestaun Finanseira Públika no Lei Tributária, aleinde halo alterasaun lei ba ZEESM no RAEOA, lei Divizaun Administrativa Territóriu nu’udar polítika armonizasaun lei hodi hala’o serbisu ezekutivu ninian.
“Susesu hirak ne’e hotu, tanba boa-vontade polítika no kolaborasaun mútua husi Prezidente Repúblika nian ho Parlamentu Nasionál. Parabéns ba ita-hotu,” nia dehan
Nune’e mós kontribuisaun opozisaun nian durante tinan ida-ne’e iha PN, bankada CNRT fó hanoin ba Governu atu nafatin rona krítika hodi tulun serbisu ezekutivu nian, maibé fiar-aan metin atu halo serbisu tuir idak-idak nia programa ne’ebé aprovadu iha PN hodi hadi’a povu nia moris.
Deputadu FRETILIN, Aniceto Longuinhos Guterres Lopes, dehan ohin hahú sesaun lejislativa daruak hodi kompleta sesaun lejislativa dalimak husi lejislatura daneen PN.
“Ohin ita loke segunda sesaun lejislativa ida-ne’e iha momentu ida-ne’ebé espesiál, tanba foin loron lima liu tiha husi Sua Santidade Papa Fransisco termina nia vizita durante loron tolu iha ita nia rai, vizita ne’ebé lori hikas naroman no esperansa foun ba povu terus na’in,” nia hateten.
Deputada KHUNTO, António Verdiál de Sousa, hateten ohin ita abertura sesaun lejislativa foun momentu reflete ba saida mak PN atinje ona hodi define meta no objetivu ba periódu agora inísia.
Haree ba dezáfiu kompleksu ba kolaborasaun empeñu hodi sai husi dezáfiu sira lori beim-estar no dezenvolvimentu ba Timor-Leste, no nu’udar bankada opozisaun asume responsibilidade fiskaliza atividade Governu no importante tebes ba Deputadu sira ezerse nia mandatu ho seriedade defende direitu povu ba serbisu sira mellora kondisaun moris.
Jornalista : Nelson de Sousa
Editór : Cancio Ximenes
