DILI, 16 setembru 2024 (TATOLI)—Prezidente Repúblika (PR), José Ramos Horta, alerta sei fó atensaun ba utilizasaun gastu orsamentu Estadu ba tinan atuál ne’e no proposta despeza sira-ne’ebé aprezenta ba tinan oin.
Notísia Relevante: PR Horta: “Ita tenke ativu luta halakon mukit no mánutrisaun’’
“Ha’u hakarak alerta ba distintu Deputada no Deputadu sira katak, ha’u sei tau atensaun ba balansu tinan atuál nian no proposta despeza sira-ne’ebé aprezenta ba tinan oin mai, hodi hein promulgasaun. Liuliu, ha’u sei monitoriza kualidade gastu nian no nesesidade atu evita gastu ne’ebé la presiza ka la nesesáriu,” PR Horta hato’o nia mensajen iha sesaun solene abertura sesaun lejislativa daruak iha lejislatura daneen iha uma fukum Parlamentu Nasionál (PN), segunda ne’e.
PR mós sei fó atensaun ba despeza sira-ne’ebé embaixada sira no servisu esternu sira halo, liuliu kustu sira-ne’ebé relasiona ho dimensaun misaun respetiva sira no objetivu sira-ne’ebé prodús, normalmente asosiadu ho sira-ne’ebé hanaran asesór no adidu sira, númeru ezajeradu sira-ne’ebé impoin ba embaixada sira lahó justifikasaun.
Despeza sira-ne’e tenke justifika loloos, apoia hosi relatóriu detalladu sira kona-ba volume serbisu nian, benefísiu sira-ne’ebé hamosu no valór akresentadu ne’ebé realiza iha nivel diplomátiku ka konsulár.
Justifikasaun sira-ne’ebé asosiadu ho benefísiu no produtividade tenke aplika mós ba serbisu autónomu, empreza no institutu públiku sira-ne’ebé Estadu superviziona.
“Justifikasaun sira-ne’e tenke iha ligasaun metin ba kualidade, efikásia no efisiénsia reforma nian, iha implementasaun Governu eletróniku, iha kontensaun ba kustu sira no iha konservasaun ba patrimóniu no ekipamentu sira, hodi garante utilizasaun di’ak ba rekursu sira-ne’ebé menus ne’ebé disponivel,” nia hateten.
Xefe Estadu hateten, konservasaun ba patrimóniu no ekipamentu sira tenke garante prazu sira ba utilizasaun ho manutensaun, reparasaun, reabilitasaun no medida sira rekuperasaun nian ba patrimóniu móvel no imóvel sira, hodi promove korte nesesáriu ne’ebé bele uza hodi fó prioridade ba kauza boot nasionál sira, envezde desperdísiu ne’ebé baibain rejista iha burokrásia no pezu ne’ebé makaas liuhusi aparellu Estadu nian.
Nia dehan, prezidénsia koa $500,000 iha nia orsamentu, hodi rediresiona fundu sira ba programa emblemátiku sira hanesan Cantina do Povo no atu apoia família sira-ne’ebé vulnerável.
“Ha’u hakarak haree ezemplu sira-ne’e Governu replika no sai sasin iha Parlamentu Nasionál ida-ne’e, durante jornada orsamentál sira. Ha’u hein atu haree la’ós de’it diskursu sira hosi responsável sira. Maibé mós medida prátika no evidente sira hodi hamenus despeza operasionál no administrativa sira, hodi favorese programa sira-ne’ebé kontribui ativamente ba moris-di’ak iha sosiál no ekonómiku sidadaun sira-nian,’’ nia hateten
Jornalista : Nelson de Sousa
Editór : Cancio Ximenes
